د روسیې د دولتي دوما د سیمه یییزو پالیسیو کمیټې ویلي، چې له افغانستان څخه روسیې ته د کارګرانو له راوستلو سره باید احتیاط وشي، ځکه د افراطیت استازي هلته ډېر دي او د متخصصانو د وړتیا په اړه هم پوښتنې شته دي. یاده کمېټه وايي، چې د افغان کارګرانو راوستل سیاسي پرېکړه ده.
د یادې کمیټې مرستیال میخایل ماتویف له نیوز روسیه سره په یوه مرکه کې ویلي چې په افغانستان کې د اسلامي بنسټپالنې ډیر استازي او د بیلابیلو ترهګرو سازمانونو غړي موجود دي.
ماتویف ټینګار کړی، « زه په افغانستان کې له هیڅ صنعت څخه خبر نه یم. نو بیا د دوی [کارګرانو] وړتیا څه ده؟ زما په اند، که څه هم روسیه د بهرنۍ پالیسۍ د موخو لپاره له افغانستان سره د اړیکو عادي کولو ته څومره لیواله وي، باید له هغه ځای څخه د هر ډول اتباعو په راجلبولو کې احتیاط وشي. که هغه زده کوونکي وي، که کارګران یا هر بل څوک».
د هغه په اند، په روسیه کې د افغانانو د پاتې کیدو خطرونه به د دوی د کار له اقتصادي اغیزو څوچنده زیات وي.
ماتویف وویل: « د افغانانو په بڼه، موږ د افراطي اسلام استازي لرو. بیلابیل سیاسي سازمانونه چې هلته په واک کې دي، بدلیږي، خو ډیری یې په وروستیو کلونو کې، د شوروي سرتیرو له وتلو وروسته، د ترهګرو په توګه په ګوته شوي دي».
هغه د سیمه ییزو متخصصینو پر وړتیاوو هم پوښتنې راپورته کړې او یادونه یې وکړه چې دی «په افغانستان کې د کوم صنعت له شته والي خبر نه دی».
دغه مرستیال ومنله چې روسیه کیدای شي د بهرنۍ پالیسۍ د ځینو موخو لپاره له افغانستان نه د کارګرانو راجلبولو ته زړه ښه کړي خو هغه باور لري چې دلته په احتیاط عمل کول اړین دي.
د جون پر۲۰ مه په افغانستان کې د روسیې د سوداګرۍ مرکز مشر روستم حبیبالله د سن پترزبورګ نړیوال اقتصادي فورم په څنډه کې د روسیې د کار وزیر انتون کوتیاکوف او د طالبانو د استازو ترمنځ د لیدنې اعلان وکړ. دوی هوکړه وکړه چې زر تنه کاري افغان کډوال روسیې ته واستوي.
د حبیبالله په وینا، شاوخوا ۱۰۰ افغانان لا دمخه په مسکو، سن پترزبورګ او تاتارستان کې د نقاشانو، ویلډینګ کارانو او بریښنایی کارکوونکو په توګه کار کوي او دا شمېر به ۱۰۰۰ تنو ته لوړ شي.
تمه کیږي د متخصصینو نوې ډله چیچنیا، داغستان او کراسنودار سیمې ته لاړه شي او په راتلونکي کې به دونتسک او لوهانسک سیمو ته هم ولېږدول شي.
په ورته وخت کې د روسیې د دوما د کار او ټولنیزې پالیسۍ کمیټې مشر یاروسلاف نیلوف ټینګار کړی چې بهرنی کاري ځواک باید یوازې په هغو صنعتونو کې وکارول شي چې روسان هلته کار نه کوي.
د خوست د عليشیرو د ځايي کوچیانو مشرانو نن د چنګاښ ۱۰ مه افغانستان انټرنشنل ته وویل چې د طالبانو تر حاکمیت لاندې له ډېرو عریضو سره سره لا هم له دوی سره د طالبانو د عدلیې وزیر عبدالحکیم شرعي توپیري چلند کوي او څوک یې غږ نه اوري.
د کوچیانو یوه ځايي مشر وویل:« تېر کال یې په خوست کې د کوچیانو ځینې کورونه او جوماتونه ړنګ کړل خو د طالبانو ټولو ادارو باندې وګرځېدو خو ټولو وویل چې د عدليې وزیر د کړنو مخنیوی نه شي کولی.»
د کوچیانو مشرانو همدراز وویل چې د کومې محکمې له پرېکړې پرته او یا هم د چا د عریضې پر اساس یې کورونه او جوماتونه ړنګ شوي، او دا چاره یوازې د طالبانو عدلیې وزیر عبدالحکیم شرعي په شفاهي امر کېږي.
افغانستان انټرنشنل ته په رارسېدلو ویډیوګانو او انځورونو کې لیدل کیږي، چې د خوست په علیشیرو ولسوالۍ کې یو شمیر کورونه او جوماتونه وېجاړ شوي دي او چتونه یې پرېوتي دي.
د کوچیانو یو بل ځايي مشر وویل«څو ځله کندهار ته لاړو چې د کوچیانو او د طالبانو عدلیې وزیر ترمنځ روان کشمکش په اړه د ملاهبت الله دفتر ته شکایت وکړو، عریضې مو ورته وسپارلی خو بیا یې هېڅ درک ونه شو.»
د کوچیانو مشران وايي، د طالبانو مشر ملاهیبت الله دې د روانو جنجالونو په اړه یو باصلاحیته پلاوی وټاکي چې له دوی سره روان ناوړه چلند او سندونه له نژدې وګوري او بیا دې یو بې طرفه راپور ملاهیبت الله ته وسپاري.
له دې وړاندې هم د کوچیانو ځینو مشرانو له افغانستان انټرنشنل سره د یولړ اسنادو په شریکولو سره ویلي وو چې د طالبانو د عدلیې وزیر عبدالحکیم شرعي د کوچیانو د استوګنې په تړاو د پخواني ولسمشر کرزي حکمونه نه مني. کوچیانو نیوکه کړې وه، چې د طالبانو عدلیې وزیر په خپلسرې توګه د دوی څلور قومي مشران بندیان کړي ول.
په لوګر ولایت کې د کوچیانو ځینو مشرانو د «۱۴۰۳ کال د مرغومي پر ۳مه» د پخواني ولسمشر حامد کرزي له خوا یولړ پخواني صادر شوي حکمونه او د ځمکو اړوند اسناد له افغانستان انټرنشنل سره شریک کړل.
د کوچیانو مشرانو هغه وخت هم د طالبانو له مشر مولوي هبت الله غوښتنه کړې وه، چې یوه خپلواکه محکمه دې جوړه کړي او د کوچیانو د ځمکو اسناد دې په دقیقه توګه پکې وڅېړل شي.
د طالبانو د عدلیې وزیر عبدالحکیم شرعي او کوچیانو ترمنځ روان کشمکش کومه نوې خبره نه ده.
تېر کال په کابل کې سرچینو افغانستان انټرنشنل ـ پښتو ته ویلی و، چې د طالبانو د عدلیې وزیر شېخ عبدالحکیم شرعي د عدلیې وزارت په ودانۍ کې شخصي زندان جوړ کړی دی. سرچینو وویل چې طالبانو په ولسي جرګه کې د کوچیانو پخوانی استازی حیدر جان نعیمزوی څو ورځې په خپل دغه شخصي زندان کې بندي کړی و.
تر اوسه د طالبانو عدلیې وزارت او هم یاد وزارت وزیر عبدالحکیم شرعي کوم غبرګون نه ښودلی.