د افغانستان لپاره د روسیې د ولسمشر ځانګړی استازی او جګپوړی سلاکار ضمیر کابلوف وايي، چې تمه ده د طالبانو نوی سفیر مولوي ګل حسن به نن ماښام مسکو ته ورسېږي. د کابلوف په وینا، «نوی سفیر به د خپل هېواد د بشپړ رسمي سفیر په توګه دنده پیل کړي».
دا څرګندونې هغه د ملګرو ملتونو تر چتر لاندې په دوحه کې د نشه يي توکو پر وړاندې د مبارزې او د افغانستان د خصوصي سکتور د پراختیا لپاره د کاري ډلو له ناستې وروسته تاس اژانس ته وکړې.
د کابلوف په وینا، «څنګه چې نوي سفیر اړین رسمي پروتوکولي مراحل بشپړ کړي، نو د خپل هېواد د بشپړ رسمي سفیر په توګه به دنده پیل کړي».
د مې میاشتې پر۱۶مه، د کازان نړیوال اقتصادي فورم په څنډو کې کابلوف ویلي و، چې طالبانو د مسکو لپاره د خپل نوي سفیر نوم روسي لوري ته سپارلی دی.
وروسته په مسکو کې د طالبانو سفارت تایید کړه چې مولوي ګل حسن د دغه ماموریت د نوي مشر په توګه ټاکل شوی دی.
د اپریل پر ۱۷مه د روسیې سترې محکمې د لوی څارنوال د غوښتنې له مخې، په دغه هېواد کې د طالبانو پر فعالیتونو بندیز وځنډاوه.
د روسیې د بهرنیو چارو وزارت په وینا، د ترهګرو ډلو له نوملړه د طالبانو نوم اېستل له کابل سره د رسمي شراکت لپاره لاره هواروي، چې د دواړو هېوادونو په ګټه تمامېږي. دا پرېکړه د مې پر ۲۰مه عملي شوه.
