په بنګلهدېش کې یوې سخت دریځې اسلامپالې ډلې ویلي چې په ټولټاکنو کې واک ته د رسېدو په صورت کې په دغه هېواد کې اسلامي او شرعي قانون پلی کړي. دوی وایي، خپل هېواد کې به د طالبانو د رژیم په څېر یو نظام بیا جوړ کړي.
د جماعت چار مونایي ډلې مشر سېدمحمد فایضالکریم تېره ورځ (جمعه) په متحده ایالاتو کې مېشت بنګلهدېشي خبریال خالد محيالدین سره په یوه مرکه کې وویل: «که موږ ټولټاکنې وګټو، نو د بنګلهدېش اسلامي حرکت به په دغه هېواد کې شرعي نظام نافذ کړي.»
هغه زیاته کړې چې د ټاکنو د بریا په صورت کې به یې د حکومتولۍ سېسټم، پر افغانستان د واکمنې ډلې طالبانو په څېر وي. ورته مهال، هغه ټينګار کړی چې د مذهبي اقليتونه، په ګډون هندوان به هم د شريعت په چوکاټ کې حقونه ولري او د هغوی حقونو ته به درناوی وشي.
د یادې ډلې مشر همدا راز ویلي چې د متحده ایالاتو، برېټانیا او روسیې په څېر هېوادونو مثبت ټکي به په دې شرط ومنل شي چې له اسلامي قانون سره په ټکر کې نه وي.
د چار مونایي جماعت اسلامي حرکت د بنګلهدېش په ځینو برخو کې یوه اغېزمنه مذهبي ډله ګڼل کېږي، خو د دوی نظرونه په دغه هېواد کې د ډېرو خلکو له پراخ مخالفت سره هم مخامخ دي.
