د پاکستان په پنجاب او خېبرپښتونخوا ایالتونو کې د وسله والو نښتو او بریدونو په ترڅ کې لږ تر لږه ۱۰ کسان چې نهه یې د شکمنو وسله والو په توګه پېژندل شوي، وژل شوي دي. چارواکي وایي، چې په دغه بریدونو کې د وسله والو له لورې سیمه ییز مشران هم په نښه شوي.
د پنجاب ډېره غازي خان ولسوالۍ کې د شنبې په سهار پولیسو د تحریک طالبان پاکستان (TTP) وسله والو سره یوه سخته نښته تایید کړه. په دې نښته کې پنځه وسله وال وژل شوي او عملیات لا هم روان دي.
د پولیسو د بیان له مخې، نښته د جادې والا کلي په سیمه کې شوې ده.
بل پلو، د خېبر پښتونخوا لکي مروت او دېره اسماعیل خان ولسوالیو کې د امنیتي ځواکونو له خوا د څلورو نورو مشکوکو وسله والو د وژلو خبر هم ورکړل شوی.
امنیتي چارواکي وايي، دا عملیات د ټیکاو د ساتلو لپاره روان دي او هیله لري چې د نورو وسله والو فعالیتونه هم ودروي.
د خېبرپښتونخوا په بنو ولسوالۍ کې بیا وسله والو قبیلوي مشر ملک عید نواز وژلی دی.
د پولیسو په وینا، دا وژنه د یوې ترهګرۍ د برید نتیجه وه.
یاده دې وي، چې د خېبرپښتونخوا په بېلابېلو سیمو کې د ناامنیو پېښې زیاتې شوې دي.
د پاکستان پوځ د جمعې په ورځ د یوه بیان له لارې ویلي، چې لږ تر لږه ۳۰ مشکوک وسله وال یې ډيورنډ کرښې ته نږدې ځایونو کې وژلي دي.
د پوځ په وینا، دغه وسله والو هڅه کوله چې له ډيورنډ کرښې را واوړي.
تېره اوونۍ بیا په شمالي وزیرستان کې ځانمرګي برید ۱۳ پاکستاني سرتېري وژلي وو، چې د پاکستان حکومت یې پړه په ټي ټي پي وسله والو واچوله او زیاته یې کړه، چې دا وسله وال په افغانستان کې پټنځایونه لري او له هغه ځایه په پاکستان کې بریدونه پلان کوي، خو طالبان بیا دا تورونه ردوي او وايي، چې د افغانستان خاوره د داسې فعالیتونو لپاره نه کارول کېږي.
