امریکا د پیټریټ هوایي دفاع سیسټم یو بل نسل جرمني ته لېږدوي، ترڅو برلین د اوکراین لپاره د خپلو ژمنو په اساس دوه پیټریټ دفاعي سیسټمونه ژر ولېږدوي. دغه پریکړه د سویس له خوا د پیټریټ سیسټمونو د ځنډېدو وروسته شوې ده.
وال سټریټ ژورنال د راپور له مخې، امریکا به د پیټریټ هوایي دفاع سیسټم خپل راتلونکې نسخې د سویس پر ځای جرمني ته واستوي، تر څو برلین ته چانس ورکړي چې د اوکراین لپاره دوه پیټریټ سیسټمونو ژمنه پر وخت پوره کړي.
دا اقدام د امریکا د دفاع وزارت لخوا د اوکراین لپاره د وسلو رسولو په برخه کې یوه مهم پرمختګ ګڼل کېږي.
د امریکا ولسمشر ډونالډ ټرمپ د جولای په ۷مه وویل چې هغه د اوکراین لپاره د اضافي پوځي مرستو ملاتړ کوي.
ټرمپ وروسته یو پلان وړاندې کړ، چې له مخې به ناټو او د اروپایي ټولنې غړي هېوادونه د امریکا جوړې شوې وسلې د اوکراین لپاره واخلي.
