د جاپان اوږدمهاله واکمن لیبرال ډیموکرات ګوند پارلماني ټاکنې وبایللې او په دغه ټاکنو کې د ښي اړخي ډلې ډېرې څوکۍ ګټلې دي. په دغه ټاکنو کې د جاپان لومړي وزیر شیګیرو ایشیبا ګوند او اېتلافي ملګرو یې له ۶۶ څخه ۱۹ څوکۍ ګټلې دي.
څېړنې ښيي، چې ځوانانو د سانسيتو او خلکو ډیموکرات ګوند ته رایې ورکړې دي؛ دا هغه ګوند دی چې د پوځ پیاوړتیا او مالیاتو د کمښت ژمنې یې کړې دي.
د اوسني لومړي وزیر د ماتې لامل د خوراکي توکو د بیو لوړوالی او امریکا سره د تعرفو په اړه تعامل کې ناکامي بلل شوې ده.
پاکستانۍ ورځپاڼو راپور ورکړی، چې د پاکستان او امریکا د بهرنیو چارو وزیران به په روانه اونۍ کې سره وويني. تمه کېږي، چې دغه لیدنه به (د جولای میاشتې پر ۲۵مه نېټه) په واشنګټن کې وشي.
په پاکستاني پلاوي کې به د دغه هېواد د بهرنیو چارو وزیر اسحاق ډار ترڅنګ د پاکستان مرستیال لومړی وزیر هم شامل وي.
د دغې لیدنې موخه د پاکستان او امریکا ترمنځ د ستراتيژیکو اړیکو پياوړتیا ښودل شوې ده.
ډار به لومړی نیویارک ته ولاړ شي او هلته به د ملګرو ملتونو د امنیت شورا لهخوا د سولې او منځني ختیځ د وضعیت په اړه د غونډې مشري وکړي او بیا به د امریکا له بهرنیو چارو وزیر مارکو روبیو سره وویني.
د امریکا ولسمشر ډنالډ ټرمپ د یکشنبې په ورځ پر خپله ټولنیزه شبکه ولیکل، چې د هغو افغانانو د ژغورنې سملاسي چارې پیلوي، چې د طالبانو له واکمنېدو وروسته له افغانستان نه وتلي او په متحده عربي اماراتو کې بند پاتې دي. ټرمپ وايي، « زه به هڅه وکړم چې ویې وژغورم، همدا اوس یې پیلوم».
د امریکا ولمسشر ډونالډ ټرمپ د یکشنبې په ورځ، د چنګاښ پر ۲۹مه پر خپله ټولنیزه پاڼه ټروت ولیکل په متحده عرب اماراتو کې د بند پاتې افغانانو د ژغورنې لپاره همدا اوس لاس په کار کیږي.
ټرمپ دا څرګندونې له هغې وروسته وکړې چې د "Just the News" په نوم یوې خبري سرچینې خبر ورکړی چې د اماراتو چارواکي غواړي یو شمېر افغان کډوال طالبانو ته وسپاري.
متحده عربي امارات، چې د امریکا نږدې امنیتي ملګری هېواد بلل کېږي، په ۲۰۲۱میلادي کال کې له کابل څخه د امریکايي ځواکونو د وتلو پر مهال زرګونه افغانان موقتي و منل.
د امریکا له حکومت سره د همکارۍ له امله دغو کسانو ته د طالبانو له وېرې پناه ورکړل شوې وه.
څو ورځې وړاندې د افغانستان لپاره د ملګرو ملتونو ځانګړي راپور ورکوونکي رېچارډ بېنېټ له متحده عربي اماراتو څخه له ګواښ سره مخ افغانانو د بېرته ستنولو په اړه اندېښنه ښودلې وه.
د راپورونو له مخې، سلګونه افغان کورنۍ چې د طالبانو له واکمنېدو وروسته امریکا او نورو هېوادونو کې د ځای پر ځای کولو په موخه په عربي متحده اماراتو کې ځای پر ځای شوې، له نامعلوم برخلیک سره مخ دي.
د اسراییل لومړی وزیر بنیامین نتنیاهو د فاسدو خوړو له امله د کولمو د پړسوب په ناروغۍ اخته شوی او دفتر یې وايي، چې درې ورځې به له کوره خپلې چارې پرمخ وړي. د نوموړي معالج ډاکټر وايي، چې نتنیاهو ته د بدن د اوبو د کمښت له امله د رګ له لارې اوبه ورکول کېږي.
د اسراییل صدراعظم بنیامین نتنیاهو، چې نن سهار، د چنګاښ پر ۲۹مه یې د وزیرانو اونیزه غونډه کې ګډون نه و کړی، مسموم شوی او درې ورځې به له کوره د دولت چارې پرمخ وړي.
د اسراییل د صدراعظم دفتر وایي چې نتنیاهو تېره شپه ناروغ شوی و. ډاکتر الون هرشکو، چې د هداسه پوهنتون روغتون د داخله طب رییس دی، د هغه د معاینې پر مهال وویل چې صدراعظم د فاسدو خوړو د خوړلو له امله د کولمو التهاب لري.
اسراییل ټایمز د هغه د معالج له خولې وايي، چې د صدراعظم وضعیت اوس ښه ښودل شوی، خو د بدن د اوبو د کمښت له امله ورته د رګ له لارې اوبه ورکول کېږي.
د نتنیاهو دفتر ویلي: « د ډاکترانو د سپارښتنې له مخې، صدراعظم به راتلونکې درې ورځې استراحت کوي او دولتي چارې به له کوره پر مخ وړي».
نتنیاهو، چې اوس ۷۵ کلن دی، په وروستیو کلونو کې له یو شمېر روغتیايي ستونزو سره مخ شوی.
په ۲۰۲۳ کې د زړه د لنډمهالي بندښت له امله روغتون ته لاړ او مخکې تر هغې د بدن د اوبو کمښت له امله روغتون ته وړل شوی و. په ۲۰۲۴ کې یې د چوره توب عملیات درلودل او څو ورځې یې د انفلونزا له امله کار پرېښی و.
د طالبانو تر واک لاندې د کانکو ازموینو ملي ادارې له لوري د کابل د پامیر نوین لېسې زده کوونکی سید موسی د ۳۵۶،۵۷۴۱۵ نمرو په ترلاسه کولو د ۱۴۰۴ کال کانکور ازموینه کې عمومي اول نومره اعلان شو. نوموړی د کابل پوهنتون طب پوهنځي ته بریالی شوی.
د یکشنبې په ورځ د طالبانو تر واک لاندې د کانکور ازموینو د ملي ادارې له لوري د ۱۴۰۴ کال د کانکور ازموینې پایلې اعلان شوې.
د ۱۴۰۴ کال د کانکور په ازموینه کې د کابل اوسېدونکی سید موسی د سید داود زوی د ۳۵۶،۵۷۴۱۵ نمرو په ترلاسه کولو سره د کانکو عمومي اول نومره اعلان شوی او کابل طب پوهنځي ته بریالی شوی.
د کابل اوسیدونکی نذیر د محمد طاهر زوی د ۳۵۶،۵۷۴۱۴ نومرو په ترلاسه کولو د کانکور ازموینې دویم نومره اعلان شو او د کابل طب پوهنځي ته بریالی شوی.
د کابل اوسېدونکی حمزه د عبداللطیف زوی په ۳۵۳،۵۳۳۱۶ نومرو د کانکور ازموینې درېیم نومره اعلان شو او د کابل پوهنتون طب پوهنځي ته بریالی شوی.
دغه راز د کابل اوسېدونکي فیصل د کلام الدین زوی په ۳۱۶،۰۶۶۲ نومرو د دیني مدرسو په ازموینه کې لومړی مقام ګټلی او د کابل پوهنتون د حقوقو او سیاسي علومو پوهنځي ته بریالی شوی دی.
د کانکور په سږنۍ ازموینه کې هم د تېرو دوو کلونو په څېر یوځل بیا د طالبانو له لوري نجونو ته د ګډون اجازه نه وه ور کړل شوې.
د طالبانو د لوړو زده کړو وزیر عبدالباقي حقاني وايي، د کانکور په سږنۍ ازموینه کې سل زره او ۵۴۸ کسانو ګډون کړی و، چې له ۵۱ زرو ډېر کسان د لوړو او نیمه لوړو زده کړو موسسو ته بریالي شوي دي.
نوموړي ویلي، چې د لوړو زده کړو په برخه کې تر ۷۷ زره او د نیمه لوړو زده کړو په برخه کې له ۳۴ زره د ډېرو کسانو د جذب او شمولیت ظرفیت لري.
طالبانو په لغمان ولایت کې د ټیکټاک ټولنیزې رسنۍ یو افغان فعال نیولی، سر یې ور خرېیلی او اعتراف ته اړ اېستی، چې نور به په ټېکټاک کې فعالیت نه کوي. د طالبانو امر بالمعروف او نهی عن المنکر وزارت د نوموړي یوه ویډیو هم خپره کړې ده.
د طالبانو د امر بالمعروف وزارت ویاند د یکشنبې په ورځ د همت الله خوشبخت په نوم د لغمان ولات د یو اوسېدونکي ویډیو خپره کړې ده او وايي، چې نوموړي په ټېکټاک کې “غیر مناسب” فعالیت ترسره کاوه.
د طالبانو په خپره شوې ویډیو کې لیدل کیږي، چې د همت الله سر یې کل کړی او له نوموړي څخه ظاهرا په زور اعتراف اخلي چې نور به په ټېکټاک کې فعالیت نه ترسره کوي.
د طالبانو د امر بالمعروف وزارت محتسبانو تردې وړاندې هم په کابل او ځینو ولایتونو کې د ټولنیزو رسنیو په ځانګړې توګه ټېکټاک فعالان نیولي او له هغوی څخه یې په ټېکټاک کې د فعالیت نه کولو اعترافونه اخېستي دي.