پښتونخوا کې د سېلابونو دوام؛ یوازې تېره شپه د شپږو ماشومانو په ګډون ۱۰ کسان مړه شوي
په خېبرپښتونخوا کې د تېرې شپې د سختو ورښتونو او سېلابونو له امله د شپږو ماشومانو په ګډون لږترلږه ۱۰ کسان مړه او دوه نور ټپیان شوي دي.
په خېبرپښتونخوا کې د تېرې شپې د سختو ورښتونو او سېلابونو له امله د شپږو ماشومانو په ګډون لږترلږه ۱۰ کسان مړه او دوه نور ټپیان شوي دي.
د خېبرپښتونخوا د طبیعي پېښو د مدیریت ادارې ویلي، چې ورښتونو، ځمکې ښویېدنې او سېلابونو ترټولو ډېر تلفات په سوات ولسوالۍ کې اړولي. په قربانیانو کې دوه ښځې هم شاملې دي.
په مالام جبه سیمه کې یوه مور او د هغې دوه ماشومان د سېلاب له امله سیند نه د تېرېدو پرمهال ډوب شوي دي. د ژغورنې ټیمونو او ځایي خلکو تر ساعتونو هڅو وروسته د هغوی مړي موندلي دي.
د سوات په مدیان سیمه کې د باران له امله د یو کور چت نړېدلی، چې له امله یې درې ماشومان مړه شوي او یوه ښځه سخته ټپي شوې ده. ټپیان روغتون ته وړل شوي او ډاکټرانو د ښځې حالت نازک بللی دی.
په باجوړ ولسوالۍ کې دوه وروڼه هغه وخت مړه شوي، چې هغوی له سیند نه د تېرېدو پرمهال په سېلاب کې ایسار شوي وو. په دې کسانو کې یو یې ۱۰ ورځې دمخه واده کړی و.
په بونیر ولسوالۍ کې هم د ورښتونو او سېلابونو له امله یو سړی او یوه ښځه مړه شوي دي.
پاکستاني چارواکو خبرداری ورکړی، چې د روانو ورښتونو له امله په غرنیو سیمو کې د ځمکې ښویېدنې او سېلابونو احتمال ډېر شوی دی. دوی له خلکو نه غوښتنه کړې، چې په غرنیو سیمو کې ډېر احتیاط وکړي.
