د طالبانو د امربالمعروف او شکایتونو اورېدو وزیر خالد حنفي دیني عالمانو، قومي مشرانو او خطیبانو ته په یوې ناسته کې ویلي، چې بهرنۍ رسنۍ پر دې بوختې دي چې افغانستان کې «بېحجابۍ، شراب خورۍ او قمار بازۍ» ته وده او پراختیا ورکړي.
نوموړي د چهارشنبې په ورځ د (زمري لومړۍ نېټه) زیاته کړې: «موږ باید د تبلیغاتو مقابله وکړو، همدا جهاد دی او هغوی هڅه کوي چې ماشومان هم منکراتو کې بوخت کړي. حتی پیسې تقسیموي، چې زموږ خویندې او مېندې بېسترۍ ته وهڅوي.»
خالد حنفي دیني عالمانو ته سپارښتنه کړې، چې د دغه ډول تبلیغاتو پر وړاندې باید کلک ودرېږي او اندېښنه یې ښوولې چې طالبان اوسمهال له همدې امله په سختې ازموینه کې ګېر دي.
د هغه په خبره: «امربالمعروف پر هر عالم فرض عین دي، دا یوازې د همدې وزارت کار نه دی؛ بلکې هر مسلمان باید د منکراتو مخنېوی وکړي.»
دغه طالب وزیر له خطیبانو غوښتنه کړې، چې د دغو تبلیغاتو خلاف پر منبرونو غږ پورته کړي او خلک پرېنږدي چې د بهرنیو رسنیو تر اغېز لاندې راشي.
پر کابل د واکمنې ډلې دې سختدریځه وزیر تر دې دمخه هم پر رسنیو توندې نیوکې کړي دي.
خالد حنفي چې له نږدې یوې میاشتې راهیسې له عام محضره ورک و، داسې مهال دغه خبرې کوي چې دغه ډلې په کابل کې د «بېحجابۍ» په تور یو شمېر ښځې نیولې دي.
د افغانستان انټرنشنل د موندنو له مخې؛ ملاهبت الله اخوند په کابل کې د خپلې ډلې د امربالمعروف وزارت پر محتسبانو بې باوره شوی، چې ګوندې کابل کې یې د بېحجابۍ مخنېوی نه دی کړی.
هغه تازه له کندهاره کابل ته پلاوی استولی او د «بېحجابۍ» په تور یې کابل کې د ښځو زنداني کول پیل کړي دي.
د طالبانو او نورو دیني عالمانو تر منځ د حجاب په تړاو ژور اختلافات شته. دغه ډله په کابل او ولایتونو کې ښځې نه پرېږدي، چې لوڅ مخ وګرځي؛ خو یو شمېر دیني عالمان پر دې چارې نیوکې کوي او د «مخ ښکاره کول» د حجاب برخه نه ګڼي.
د نړۍ یو شمېر لوی دیني عالمان هم د ښځو له لوري د مخ ښکاره کول په «اسلامي شریعت» کې د حجاب برخه نه بولي.
طالبان همدا راز په بازارونو کې ان د ښخو پر خبرو هم بندیزونه لګولي دي.
