طالبان وایي، په هرات کې د پاشدان بند چارې مخ په بشپړېدو دي
د طالبانو د اوبو او انرژۍ وزارت خبر ورکړی، چې په هرات کې د پاشدان بند چارې په بېلابېلو برخو کې بشپړېدو ته نږدې شوې دي او ډېر ژر به ګټې اخیستنې ته وسپارل شي.
د طالبانو د اوبو او انرژۍ وزارت خبر ورکړی، چې په هرات کې د پاشدان بند چارې په بېلابېلو برخو کې بشپړېدو ته نږدې شوې دي او ډېر ژر به ګټې اخیستنې ته وسپارل شي.
د دغه وزارت په خبرپاڼه کې راغلي، د اوبو لګولو کانال یې ۷۰سلنه، د بند دېوال او دننه سل سلنه او د نورو برخو کارونه ۹۸سلنه بشپړ شوي.
له دغه بند څخه د (زمري لومړۍ) نېټه د طالبانو د انرژۍ او برېښنا وزیر عبدالطیف منصور سره په ګډه په هرات کې د دغه ډلې والي مولانا اسلام جار لیدنه کړې ده.
پر افغانستان واکمنه ډله ادعا لري، چې پر پاشدان بند ټول ټال ۱۱۷مېلیون ډالره لګښت راځي او ۱۳زره هکټاره کرنیزه ځمکه به خړوبه کړي.
همدا راز ویل شوي، چې د دغه بند له جوړېدو سره به ۲۰۰مېلیونه متر مکعبه اوبه هم مدیریت شي.
طالبان داسې مهال د دغه پروژې د بشپړېدو ادعاوې کوي، چې دې ډلې ډېر کله له مخکیني جمهوریت څخه پر ورپاتو نیمکړو پروژو تبلیغاتي شخوند وهلی دی.
باورونه دا دي، چې طالبان د تېر جمهوري نظام پروژې د نویو پروژو په نوم بیا پیلوي او غواړي په دې سره خلکو ته وښيي چې ګني دوی سترې رغنیزې پروژې پیل کړې دي.
طالبانو تر اوسنۍ واکمنۍ دمخه د کمال خان بند په ګډون د اوبو بندونو تر څنګ د بېلابېلو پروژو لپاره امنیتي سرخوږی جوړ کړی و او نه یې پرېښودل، چې پلې شي.
طالبانو د سړکونو، پلونو، ښوونځیو، روغتیايي ودانیو او ډول ډول پروژو خلاف خپلې وسلې د مخنېوي لپاره کارولې دي.
نیوکې دا وې، د طالبانو له لوري رغنیزو پروژو ته ګواښونه د دې لامل شوي وو چې سلګونه پروژې په ټپه ودرېږي یا هم له ځنډ او خنډ سره مخ شي.
پر کابل دغه واکمنه ډله اوس وخت ناوخت د هغو سړکونو بیا رغونې هم کوي، چې د همدوی له لوري په چاودېدونکو توکو تخریب شوي وو.
کارپوهان وایي، طالبان تر ډېره له رغنیزو پروژو د پروپاګنډې او د دغه ډلې د مثبت انځور لپاره د یوې وسیلې په توګه استفاده کوي او په عملي توګه بیا پروژو د پلي کېدو فعالیتونه چندان نه ترسترګو کېږي.
