د پاکستان تحریک انصاف بنستګر عمران خان ویلي، که د خېبر پښتونخوا وزیر اعلی علی امین ګنډاپور، په خپل ایالت کې د قانون او نظم د ټینګښت توان نه لري، نو باید له خپلې دندې استعفا ورکړي. هغه زیاته کړه، که ګنډاپور د حکومتدارۍ ستونزې نه شي حل کولی، نو دا چاره دې بل وړ کس ته وسپارل شي.
د پاکستان جیو نیوز د تحریک انصاف ګوند د بنسټګر د نږدې سرچینو له قوله لیکلي، چې عمران خان ویلي: «که علی امین ګنډاپور سوله نشي راوستلی، نو باید استعفا ورکړي.»
د پولیسو د راپور له مخې، د ۲۰۲۵ کال په لومړیو اوو میاشتو کې په خېبر پښتونخوا کې د ترهګرۍ لږترلږه ۴۷۶ پیښې شوې دي. په دغو پېښو کې یوازې په خېبرپښتوخوا کې ۱۲۱ ملکي وګړي وژل شوي او ۳۰۱ نور ټپیان شوي دي.
په دې موده ۶۶ پولیس منسوبین وژل شوي او ۹۰ نور ټپیان شوي دي.
د یادونې وړ ده، چې په خېبرپښتونخوا کې د پاکستان تحریک انصاف ګوند حکومت واکمن دی.
د سولې جرګې غړو د جمعې په ورځ (د زمري په ۱۰مه) د ماموند تحصیل سیمې په یوه جومات کې د پاکستاني طالبانو له استازو سره لیدلي.
د پاکستان جیو ټلوېزیون د راپور له مخې، د پاکستاني طالبانو استازو ویلي چې دوی به د قبایلي جرګې د ګډونوالو دا غوښتنې "په افغانستان کې له خپلو مشرانو" سره شریکې کړي.
ټي ټي پي تر اوسه په دې اړه په رسمي ډول څه نه دي ویلي.
دا خبرې اترې په داسې حال کې ترسره کېږي، چې د تېرا درې زرګونو اوسېدونکو د دوشنبې په ورځ پراخ لاریون وکړ او د ناامنۍ، اقتصادي ستونزو او د ورځني ژوند د ګډوډۍ له امله یې له سیمې د وسلهوالو د وتلو غوښتنه وکړه.
دا لاریون هغه وخت په تاوتریخوالي بدل شو کله چې د پاکستان د پوځ ځواکونو ډزې وکړې، لږترلږه درې لاریون کوونکي یې ووژل او اته نور یې ټپیان کړل.
خو ځايي قبایلو د جمعې په ورځ د سولې جرګه وکړه او له سیمې څخه یې د وسله والو په ځانګړې توګه د پاکستاني طالبانو د وتلو غوښتنه وکړه.
ډان ورځپاڼې د شنبې په ورځ راپور ورکړی چې د جرګې غړو ته د تحریک طالبان پاکستان (ټيټيپي) استازو ژمنه کړې چې په افغانستان کې به له خپلو مشرانو سره سلا مشوره وکړي. دا خبره ښيي چې د پاکستاني طالبانو د قوماندې جوړښت لا هم په افغانستان کې موجود دی.
پاکستاني چارواکي اټکل کوي چې شاوخوا څلور زره پاکستاني طالبان په افغانستان کې فعالیت کوي.
خو طالبانو تل په افغانستان کې د پاکستاني طالبانو شتون رد کړی دی.
د افغانستان د بیارغونې لپاره د امریکا ځانګړې څارونکې ادارې (سیګار) د جمعې په ورځ په خپل وروستي راپور کې وویل چې د القاعدې، پاکستاني طالبانو او داعش خراسان په ګډون ترهګرې ډلې په افغانستان کې فعالې دي.
سربېره پردې، درېیو بېلابېلو سرچینو مخکې افغانستان انټرنشنل ته ویلي وو چې د ټيټيپي غړي په کابل او یو شمېر نورو ښارونو کې هڅه کوي چې د افغانستان له خاورې څخه د پاکستاني پوځ پر ضد د بریدونو لپاره بېپیلوټه الوتکې وپېري.
