په کابل کې سرچینو افغانستان انټرنشنل ته وویل، چې اسلام اباد ته د طالبانو د بهرنیو چارو وزیر امیرخان متقي پلان شوی سفر د « تخنیکي ستونزو» له امله وځنډېد. ټاکل شوې وه نوموړی د زمري پر۱۳مه په درې ورځني رسمي سفر پاکستان ته لاړ شي.
د پاکستان د بهرنیو چارو وزیر اسحاق ډار کابل ته په خپل وروستي سفر کې متقي ته د اسلام اباد د سفر بلنه ورکړې وه.
سرچینې افغانستان انټرنشنل ته وویل، چې د سفر د ځنډېدو لامل « تخنیکي ستونزې» دي او ډېر زر به د سفر نوې نېټه اعلان شي.
په کونړ کې سرچینو افغانستان انټرنشنل ته وویل چې طالبانو له دغه ولایت څخه د تحریک طالبان پاکستان د یو شمېر غړو کورنۍ غزني او زابل ولایتونو ته انتقال کړې دي. د سرچینو په وینا، دغه کورنۍ له خاص کونړ، مروره، ماڼوګۍ، سرکاڼو او دانګام ولسوالیو څخه انتقال شوې دي.
په کونړ کې سرچینو نن یکشنبه، د زمري ۱۱مه، وویل چې له یوې میاشتې راهیسې د کونړ له بېلابېلو ولسوالیو څخه د تحریک طالبان پاکستان د غړو اړوند کورنیو د انتقال بهیر پیل شوی دی.
د معلوماتو له مخې، دغه کورنۍ د طالبانو د یوې ځانګړې کمېتې له خوا له ټي ټي پي سره په همغږۍ په ځانګړو پوځي موټرو کې لېږدول شوې دي.
د کونړ ولایت د خاص کونړ ولسوالۍ ځینو اوسېدوونکو د ټي ټي پي د غړو د کورنیو انتقال تایید کړ او ویې ویل چې زیاتره کورنۍ د خیبر پښتونخوا د باجوړ او مومندو ولسوالیو اړوند دي.
د کونړ یوه ځايي قومي مشر افغانستان انټرنشنل ته وویل:« یوازې د خاص کونړ ولسوالۍ د ولۍ او شالۍ په درو کې د ټي ټي پي شاوخوا ۲۵ کورنۍ اوسېدلې، چې دا ټولې یې انتقال کړې دي.»
د سرچینو په وینا، تر دې دمه د تحریک طالبان پاکستان د دوو مسوولانو کورنۍ لاهم په خاص کونړ ولسوالۍ کې پاتې دي.
سرچینو زیاته کړه، «د ټي ټي پي د ځايي مالي مسوول ملا حیدر او د استخباراتو غړي قاري کامران کورنۍ تر اوسه پورې په خاص کونړ کې دي او تر اوسه نه دي انتقال شوې.»
د ځايي اوسېدونکو په وینا، د ټي ټي پي ځايي مسوولینو له خلکو مرستې او عشر هم ټولول، خو ځايي خلکو په خپله خوښه مرستې ورکولې.
د کونړ سرکاڼو ولسوالۍ د شونګړۍ درې ځینې اوسېدونکي هم تاییدوي چې له دې درې څخه هم د ټي ټي پي ځینې کورنۍ لېږدول شوې دي.
ددې سیمې یوه اوسېدونکي افغانستان انټرنشنل ته وویل، « د جمهوریت پرمهال لږ پټ ګرځېدل خو اوس له وسلو او موټرو سره په سیمه کې ګرځېدل.»
د سرچینو په وینا، د ټي ټي پي یو شمېر کورنۍ چې له خوست او پکتیکا څخه غزني ته انتقال شوې وې، ځینې کسان یې بېرته خوست او پکتیکا ته ستانه شوي دي او نیوکه کوي چې هلته یې د ژوند امکانات ښه نه دي.
له دې وړاندې تېر کال د سلواغې په میاشت کې افغانستان انټرنشنل له خپلو سرچینو خبر ورکړ، چې طالبانو د تحریک طالبان پاکستان اړوند لسګونه کورنۍ په پټه د خوست له ګلان کمپ، شاوخوا کلیو، اسماعیل خېلو ولسوالۍ او د پکتیکا له سرحدي سیمو نه د غزني د کډوالو کمپونو ته انتقال کړې دي.
د طالبانو حکومت ددغو کډوالو د کورنۍ هر غړي ته ۴۰ ډالره میاشتنۍ معاش منلی و.
دا انتقال له ټي ټي پي سره د طالبانو حکومت د یوې هوکړې له مخې ترسره شوی، چې اړوندې کورنۍ او د هغوی غړي به نه بایومټریک کیږي، انځورونه به یې نه اخستل کیږي او هرې کورنۍ ته به میاشتنی معاش او د انتقال او کور د وسایلو لګښتونه ور کول کیږي.
د وزیرستاني بې ځایه شویو کورنیو په انتقال کې یوې ښکیلې سرچینې هغه مهال افغانستان انټرنشنل ته ویلي و، چې « کورنۍ په دې شرط انتقال ته رضامندې شوې، چې د هغوی محرمیت وساتل شي او مالي مرسته ورکړل شي».
د ټي ټي پي جنګیالیو ته په لوګر، میدان وردګو، کندز، او بغلان کې هم د استوګنې وړاندیز شوی و، ځکه په دغو ولایتونو کې د مسید او وزیر قبیلو اړوند خلک اوسېږي، خو هغوی انکار کړی و، ځکه څومره چې دوی له ډیورنډ کرښې نه لرې کیږي، هغومره د جګړې امکانات او اکمالات ورته ستونزمن کیږي.
په غزني کې یوې سرچینې افغانستان انټرنشنل ته ویلي و، چې « قره باغ ته یوازې د عادي جنګیالیو کورنۍ لېږدول شوې، د قوماندانانو کورنۍ یې په کابل او لویو ښارونو کې اوسيږي».
د طالبانو حکومت او د پاکستاني طالبانو غورځنګ غزني او زابل ته له کونړ نه د جنګیالیو د کورنیو د انتقال په تړاو تر اوسه څه نه دي ویلي.
د پاکستان د طالبانو تحریک د غړو د انتقال په تړاو دا رپوټونه داسې مهال دي، چې د طالبانو حکومت د پاکستاني جنګیالیو په تړاو د اسلام اباد تر فشار لاندې دي.
د طالبانو تر واک لاندې د افغانستان د احصایي او معلوماتو ملي ادارې خبر ورکړی چې په تېره چنګاښ میاشت کې ۴ زره او ۴۶ بهرمېشتو افغانانو ته یې له فزیکي حضور پرته د تابیعت تذکرې ورکړې دي.
نوموړې ادارې نن (یکشنبه، زمري ۱۲مه) پر خپله اېکسپاڼه کې لیکلي، په ورکړل شویو تذکرو کې نوې، مثنی او هغه تذکرې شاملي دي چې بیا ځلي اصلاح شوي دي.
د احصاییې او معلوماتو ادارې په وینا، په تېره یوه میاشت کې یې په کابل کې نږدې ۱۴ زره کسانو د تذکرې د ورکړې، اصلاح او نور اړوند خدمتونه هم وړاندې کړي دي.
دا په داسې حال کې ده چې تر دې وړاندې ځینو کسانو د تذکرو د وېش پرمهال د دغې ادارې د اړوندو مامورینو د بېپروايۍ له امله په دغه مهم سند کې د تیروتنو په اړه شکایتونه کړي وو.
د طالبانو عدلیې وزارت اعلان کړی چې د دغې ډلې یوې ځانګړې محکمې د ځمکو قضیو ته د رسېدنې په لړ کې د په میدان وردګ ولایت کې د «شهر نو» په نوم د یوه ښارګوټي ۸۸۵ جریبه ځمکه دولتي اعلان کړې ده. د طالبانو په وینا، دا ځمکه د همدې ولایت په مرکز کې پرته ده.
د یاد وزارت په خبرپانه کې یکشنبه (زمري ۱۲مه) راغلي چې د دغې ډلې د ځمکو د غصب څخه د مخنیوي او غصبشویو ځمکو د استرداد قانون د ۱۷مې مادې له مخې یاده پرېکړه شوې ده. طالبانو ویلي، د دوی ځمکو غصب مخنیوي کمېسیون مسوولیت لري چې له زورواکو او غاصبینو څخه دولتي ځمکې وژغوري.
پر کابل واکمنه ډله زیاتوي، د هېواد په څلورو ولایتونو کې یې یاد کمېسیون فعالیت او تخنیکي پلاوي یې په بېلابېلو سیمو کې د ځمکو د تشخیص مسوولیتونه لري. طالبانو تر دې مخکې په کابل کې هم د یو شمېر ښارګوټو ځمکې دولتي اعلان کړې وې چې یو یې هم په دې وروستیو کې د پغمان سیمې اړوند د ملا عزت ښارګوټی و.
طالبان داسې مهال د ځمکو د غصب مخنیوي په تړاو ادعاوې کوي چې اندېښنې شته د همدې ډلې اړوند سیمهییزو قوماندانانو په بېلابېلو ولایتونو کې دولتي او نادولتي ځمکې په زوره نیولي او ان ځینو په کې ودانۍ او باغونه هم جوړ کړي دي. د مخکېني جمهوري نظام پر مهال هم لوړ پوړي دولتي چارواکي، سیمهییز زورواکي او ان د ملي شورا غړي د ځمکو په غصب کې ښکېل وو.
باورونه دا دي چې افغانستان کې دولتي ځمکې په خورا تخنیکي او سېسټماټیک ډول غصب شوي او دا لړۍ د طالبانو په اوسنۍ واکمنۍ کې هم په مختلفو ډولونو روانه ده. په یو شمېر ولایتونو کې د طالبانو له لوري د ښارګوټو له دولتي کېدو وروسته خلک شکایتونه کوي چې تر اوسه هم ورته بدیلونه نه دي وړاندې شوي او باید د دوی د ملکیتونو برخلیک معلوم شي.
طالبان وايي چې د نورستان ۸ کیلوګرامه ګرانبیه او نیمه ګرانبیه ډبرې یې پلورلي دي. د دې ډبرو ارزښت پنځه مېلیونه افغانۍ ښودل شوی دی.
د طالبانو تر کنټرول لاندې باختر خبري اژانس یکشنبه (زمري ۱۲مه) د نورستان د کانونو او پټرولیم رییس مولوي سیدالرحیم عمیر په حواله راپور ورکړی چې د دغه ولایت د مرکز پارون له بېلابېلو کانونو څخه ترلاسه شوي ډبرې د ازادې سيالۍ له لارې داوطلبۍ ته وړاندې شوي.
په راپور کې راغلي چې په دې ډبرو کې کونزایټ، بیروج او کمرین شاملې دي.
د کډوالو ستونزو ته د طالبانو د رسېدنې کمېسیون وايي چې پرون (شنبه، زمري ۱۱مه) له ایران او پاکستانه څه باندې څلور زره کسان افغانستان راستانه شوي دي.
د طالبانو د ویاند مرستیال احمدالله فطرت نن (یکشنبه، مري ۱۲مه) د کډوالو ستونزو ته د رسېدنې کمېسیون د ورځني راپور په خپرولو سره ویلي چې له راستانه شویو کسانو سره مرستې هم شوي دي.
په راپور کې همدا راز راغلي چې ستانه شوي ټول کسان په زور له یادو هېوادونو اېستل شوي دي.
د ملګرو ملتونو، نړۍوالې ټولنې او د طالبانو له پرلهپسې غوښتونو سره سره ایران او پاکستان افغانستان د کډوالو د ستنولو لړۍ جاري ساتلې ده.