په داسې حال کې چې د زلزلې رسمي شمېرې لوړیږي، سرچینو افغانستان انټرنشنل ته وویل، چې د کونړ ولایت د څوکۍ ولسوالۍ اړوند چلس سیمه کې لا هم ګڼ کسان تر کنډوالو لاندې دي. د سرچینو په وینا، د چپې درې ولسوالۍ خلکو پرون په دې سیمه کې شل جسدونه له خاورو راایستي دي او نن هم خلک بوخت دي.
تازه د طالبانو ویاندویانو اعلان کړی، چې په کونړ ولایت کې د وروستۍ زلزلې د قربانیانو شمېر تر دې دمه ۱۴۵۷ تنو ته رسېدلی او د ټپیانو شمېر ۳۳۹۴ دی.
افغانستان انټرنشنل ته ځايي سرچینو وویل، چې د څوکۍ ولسوالۍ اړوند چلس سیمه کې، چې لرې پرته سیمه ده او زلزلې یې لارې ویجاړې کړې دي، اوس هم خلک تر اورو او کنډوالو لاندې دي.
یوه ځايي روغتیاپال وویل: «چلس یوه لرې پرته سیمه ده، پرون د چپې درې ولسوالۍ خلک ورغلي وو، یوازې پرون یې شل جسدونه له خاورو راایستي دي، نن هم خلک بوخت دي، خو لا هم نه ده معلومه چې څومره کسان مړه شوي دي، ځکه هلته اړیکه نه کېږي.»
په ورته وخت کې، د ننګرهار ولایت مقام پر ایکس لیکلي چې د ټپیانو د ژغورنې عملیات روان دي او ټولې حکومتي ادارې د خلکو په ملتيا له زلزلهځپلو کورنیو سره د مرستې هڅې کوي.
د طالبانو حکومت ویلي چې، له یو شمېر هېوادونو مسلکي ژغورونکي هم سیمې ته رسېدلي او په عملیاتو کې برخه اخلي.
