د حزب اسلامي د مشر ګلبدین حکمتیار زوی حبیب الرحمان حکمتیار وايي، انټرنېټ د اړیکو په جوړولو، د زده کړو او د هېواد د پرمختګ لپاره تر ټولو مهمه وسیله ده او همداراز یې هیله څرګنده کړې، چې د نوري فایبر انټرنېټ، د انټرنېټ د سراسري پرې کېدو پیلامه نه شي.
حبیب الرحمان حکمتیار په خپله اېکس پاڼه لیکلي، په داسې حال کې چې نړۍ د مصنوعي ځيرکتیا پر لوري روانه ده «موږ ان د دې اجازه ورنکړو چې خلک د ورځې له اطلاعاتو او معلوماتو اطلاع ترلاسه کړي.» د هغه په وینا: «دغه ډول وضعیت د ملت د ماتېدو او تیارو ته د غورځېدو لامل کېږي.»
نوموړی زیاتوي، مبارزه د پوهې له لارې شونې ده او ورسره غوره راتلونکې تضمینېږي «نه له هغې سره د دوښمنۍ له لارې.»
د حبیب الرحمان حکمتیار په باور، یوازې د چاپ ماشین ته په نه سترګه کتلو سره اسلامي نړۍ څو پېړۍ د نړۍ له روان کاروانه شاته پاتې شوه او اروپا یې داسې ځای ته ورسوله چې د هغو په نظر کې عثماني امپراتوري کمزورې ښکارېده. د هغه په وینا، په هغه وخت کې د ورځې له پوهې سره دوښمني د اسلامي نړۍ د ماتې او پاشل کېدو لامل شو. «انټرنېټ خو لا له چاپ ماشین څخه ډېر مهم دی.»
