د کندهار یوه باوري سرچینه افغانستان انټرنشنل-پښتو ته وایي، چې طالبانو د پرون (سېشنبه) ماښام له ۵:۰۰ بجو نه د شپې تر ۹:۰۰ بجو پورې له «سلام مخابراتي شبکې» پرته نورې ټولې مخابراتي شبکې بندې کړې وې. سرچینه زیاتوي، چې له دې وروسته بیا شبکې بېرته فعاله شوې.
د سرچینې په وینا، نن (چهارشنبه) سهار د لمانځه پرمهال هم ټولې شبکې فعاله دي؛ خو یوازې د «نوري فایبر» خدمتونه لا هم بند دي.
د انټرنېټ پرې کېدو په افغانستان کې د بانکولۍ په برخه کې هم جدي خنډونه رامنځته کړي دي. یوې سرچینې افغانستان انټرنشنل ته وویل: «په مزار شریف کې بانکولي له جدي خنډونو سره مخامخ وه. له دې وضعیت وروسته، د طالبانو والي امر وکړ چې بانکونه، د برېښنايي تذکرو دفتر او څو ورته ادارې دې د انټرنېټ له بندېدو معاف شي.»
طالبانو د دغې ډلې مشر ملا هبتالله په امر د دوشنبې په ورځ د بلخ او کندهار په ګډون ۵ ولایتونو کې انټرنېټي خدمتونه بند کړل.
له دې وروسته د طالبانو د مخابراتو وزارت وویل چې هر شرکت چې وایفای انټرنېټ ته اړتیا لري، باید رسمي غوښتنلیک ورکړي او د استخباراتو له تایید او د وزارت له مراحلو تېر شي نو بیا د انټرنېټ اجازه ترلاسه کولای شي.
طالبانو انټرنېټي خدمتونه بند کړي، چې دا په اوسنۍ نړۍ کې د بانکولۍ او مخابراتو لپاره یوه اساسي اړتیا ده. په افغانستان کې د نړۍوالې ټولنې د حضور په تېرو دوو لسیزو کې انټرنېټي خدمتونو په هېواد کې د پام وړ پرمختګ کړی او ډېری لوی مخابراتي او انټرنېټي شرکتونه هلته فعالیت لري.
