نن سېشنبه (د تلې لومړۍ نېټه) پر تېراه د پرونیو بمباریو په غبرګون کې د پښتونخوا په باړې بازار کې خلکو احتجاجي پرلت پيل کړ. د احتجاج په ډول د باړې بازار تړل شوی او ښایي، چې د دغه احتجاج لمن د پښتونخوا نورو ښارونو ته هم خپره شي.
ځایي سرچینو افغانستان انټرنشنل ته ویلي، چې خلکو د پښتونخوا ایالت په تېراه سیمه کې د پرونیو بمباریو د قربانیانو لپاره په باړې بازار کې لومړۍ دعا وکړه او ورسره سم دغه بازار وتړل شو او خلکو د احتجاج په ډول پرلت پيل کړ.
د سرچینو په حواله؛ پرلت ته ځایي سياسي مشرانو ویناوې پيل کړې او دغه پېښه یې غندلې ده.
سرچینو افغانستان انټرنشنل ته ویلي، چې ښایي دغه احتجاج دوام وکړي او نورو سیمو لکه په پېښور کې د کور کمانډر هاوس او نورو ځایونو ته هم وغځېږي.
پرون د پښتونخوا په تېراه ولسوالۍ کې د پاکستاني جېټ الوتکو په هوايي بمباریو کې د ښځو او ماشومانو په ګډون ۲۰ کسان وژل شوي دي. دغه ډول په دې بمباریو کې ۵ کورونه هم په بشپړه ډول ویجاړ شوي دي.
د دې پېښې په تړاو د پاکستان ځينو سیاسي مشرانو لکه محسن داوړ او اېمل ولي خان هم غبرګونونه ښودلي دي.
اېمل ولي خان د دوشنبې ناوخته (د وږي ۳۱مه) په خپلې اېکس پاڼې د پاکستان دولت د خپلو خلکو قاتل وباله او د پوښتنې په توګه یې مطرح کړې، چې «د شپې له خوا د ښاري سیمو بمباري د کوم قانون او کوم انسانیت له مخې ترسره کېږي؟»
د نوموړي په وینا، که پلمه دا وي چې هلته د ترهګرو د په نښه کولو په موخه بمباري شوې: «نو ایا د پاکستان ټکنالوژي د داسې بېکاره او غېر مسلکي کسانو په لاس کې ده؟»
اېمل ولي خان ولایتي او فډرالي ادارو مجرمانه چوپتیا هم شرمناکه بللې او په وینا یې دا باید واضیح شي، چې که چېرې دغه عملیات د ترهګرو پر ضد و، نو وژل شوې ښځې او ماشومان په کومه کټګورۍ کې راځي.
نوموړي د دغه خونړي برید په اړه د شفافو څېړنو او اغېزمنو کورنیو ته یې د عدالت غوښتنه کړې او همداراز یې پر سیمه ییزو ادارو په نیوکو سره ویلي، چې که ولایتي ادارې په دې برید او عام وژنه کې لاس نه لري، نو حکومت باید پرېږدي او د خلکو منځ ته دې راشي.
د یادونې وړ ده، چې تېره شپه ناوخته په تیراه کې د پاکستاني جېټ الوتکو په هوایي بریدونو کې لږ تر لږه ۲۰ولسي وګړي وژل شوي او پنځه کورونه په بشپړه توګه ویجاړ شوي دي. د ځايي اوسېدونکو په وینا، په وژل شویو کسانو کې ښځې او ماشومان هم شامل دي.
د دغو بریدونو په غبرګون کې د خېبرپښتونخوا د باړې بازار نن وتړل شو او ځايي خلکو د یوه لاریون په ترڅ کې د تېرې شپې د هوايي بریدونو عاملینو ته د سزا ورکړې غوښتنه وکړه. د دغه لاریونوالو په وینا، په دغو بریدونو کې په قصدي ډول عام خلک په نښه شوي دي.
د پاکستان حکومت لا تر اوسه په دې تړاو څه نه دي ویلي.