د طالبانو د کورنیو چارو وزارت وايي، چې نن مازديګر د کابل ولايت د پنځمې ناحیې د قلعه کاشف سیمې د نجارۍ سرای په یوه برخه کې د اورلګېدنې له امله اته میلیونه او ۴۰۰ زره افغانۍ زیان اوښتی دی.
د طالبانو د کورنیو چارو وزارت ویاند عبدالمتین قانع وايي، د اوروژنې ډله توانیدلې چې اور په بریالیتوب سره کنټرول کړي.
هغه زیاتوي چې د درنو مالي زیانونو او نورو سیمو ته د اور د خپریدو مخه نیول شوې ده.
د طالبانو د سرچینو په وینا، په دغه اور کې د اته میلیونه او ۴۰۰ زره افغانيو په ارزښت مالي زيان اوښتی دی. قانع دا هم وویل چې د ۱۵میليونه افغانيو په ارزښت د هېوادوالو مالونه له اور څخه ژغورل شوي دي.
