په ډېره اسماعیل خان کې د پاکستاني پوځ عملیات؛ د «ټي‌ټي‌پي» ۱۳ غړي وژل شوي

اسد قیصر له افغانستان انټرنشنل-پښتو سره په خپلو خبرو کې ټینګار کړی، چې تحریک انصاف ګوند د یوې لويې جرګې د جوړولو پلان لري، څو د طالبانو او پاکستان ترمنځ د باور فضا رامنځته شي او شته ستونزې د خبرو اترو او تفاهم له لارې حل شي.

هغه زیاته کړه: «موږ غواړو د ولسونو ترمنځ د دوستۍ فضا پیاوړې کړو. جګړه هېڅکله د حل لاره نه شي کېدای. دواړه هېوادونه اړ دي چې د ګډو هڅو له لارې سولې ته ورسېږي.»

نوموړي د پاکستان پر مرکزي حکومت هم نیوکې وکړې او ویې ویل، چې د اوسني حکومت پالیسۍ سمې نه دي، بلکې د خلکو د غوښتنو او واقعي اړتیاوو سره سمون نه لري.

هغه د یوې پوښتنې په ځواب کې چې د هېوادونو ترمنځ خبرې اترې د مرکزي حکومتونو مسوولیت دی، وویل: «مونږ یو سیاسي ګوند یو او خلکو رایه راکړې ده. زموږ مسوولیت دی چې د خلکو استازولي وکړو او د طالبانو سره د ستونزو د حل لپاره دایمي لاره ولټوو.»

اسد قیصر په خپلو څرګندونو کې دا هم وویل، چې په پاکستان کې یې د طالبانو له سفیر سره هم لیدلي. د هغه په وینا، د طالبانو استازي ورته څرګنده کړې چې هغوی نه غواړي د افغانستان خاوره د کوم بل هېواد پر ضد وکارول شي، خو دا هم مني چې د طالبانو د حکومت کورنۍ ستونزې ډېرې دي او د حل لپاره یې نړۍوالو او سیمه‌ییزو همکاریو ته اړتیا لري.

قیصر باور څرګند کړ، چې د طالبانو او پاکستان ترمنځ د باور جوړونې لپاره د منځګړیتوب یوه پراخه کړنلاره مهمه ده. هغه په ځانګړي ډول د چین، سعودي عربستان او د ملګرو ملتونو رول یاد کړ او ویې ویل: «که دا دوستان د منځګړتوب مسوولیت واخلي، نو دواړه هېوادونه کولای شي خپلې ستونزې د خبرو له لارې حل کړي. د جګړې پر ځای یوازې تفاهم او ډیالوګ د تلپاتې سولې لاره هوارولی شي.»

د تحریک انصاف ګوند دغه مشر په پای کې ټینګار وکړ، چې د افغانستان او پاکستان اړیکې یوازې د دولتونو نه، بلکې د ولسونو د ګډ برخلیک یوه برخه ده. د هغه په خبره، که دواړه هېوادونه سوله ییزې لارې غوره کړي، نه یوازې به په سیمه کې د تاوتریخوالي کچه راټيټه شي، بلکې د اقتصادي او ټولنیزو همکاریو نوې دروازې به هم پرانېستل شي.

په خیبرپښتونخوا کې سرچینو افغانستان انټرنشنل ته وویل، د تیراه د پېښې د قربانیانو د استازو او ایالتي حکومت د چارواکو ترمځ ناسته کې ولسي استازو غوښتنه کړې، چې د خیبر پښتونخوا اعلی وزیر علي امين ګنډاپور او د پېښور قول اردو قوماندان دې د پرلت ځای ته ورشي او د قربانیو له کورنیو دې په رسمي ډول بښنه وغواړي.

هغوی دا ټینګار هم کړی چې که غوښتنې یې ونه منل شي پرلت به ادامه لري.

بل لور ته د پاکستان حکومتي پلاوي غړو لاریونوالو ته ډاډ ورکړی، چې د خیبرپښتونخوا اعلی وزیر به سبا يا بله ورځ پخپله د پرلت ځای ته ورشي او د قربانيانو له کورنیو سره به د خواخوږۍ او فاتحې لپاره وګوړي.

د سرچینو په وینا، د خبرو تر پای ته رسېدو وروسته د پاکستان حکومتي پلاوی پېښور ته ستون شو او په دې پلاوي کې د ایالتي وزیرانو تر څنګ د پېښور کمېشنر هم شامل و.

د یادونې وړ ده، چې تېره ورځ په تېراه کې د پاکستان جېټ الوتکو د ملکي خلکو پر کورونو بمبار وکړ، چې د دوو کورنیو ۲۱ کسان پکې وژل شوي دي.

د تیراه خلکو ددې مرګونې پېښې په غبرګون کې له تیرې ورځې راهیسې پرلت پیل کړی دی.

علي امین ګنډاپور د سې شنبې په ورځ په پېښور کې د خبري کنفرانس پر مهال وویل چې د طالبانو حکومت د ګډو ستونزو د حل اراده لري او په نږدې راتلونکې کې به یو ایالتي پلاوی کابل ته ولاړ شي.

نوموړي زیاته کړه چې د خبرو اجنډا کې به ډيورنډ کرښې ته څېرمه تاوتریخوالي، سوداګریز خنډونه او د افغان کډوالو د زیات بار ستونزه شامل وي.

ګنډاپور د فدرالي وزیر وروستۍ څرګندونې "د خواشینۍ وړ" وبللې او ټینګار یې وکړ چې د خېبرپښتونخوا حکومت کولای شي دغه ستونزې په مستقیم ډول له کابل سره حل کړي.

هغه د پاکستان د امنیتي او سیاسي وضعیت په اړه وویل چې پر ده جوړې شوې قضیې بې‌ بنسټه دي او له خپلې ګوندي مبارزې نه‌ پر شا کېږي.

د نوموړي په وینا، د ولسي غونډو له لارې به وښيي چې ټول ملت د تحریک انصاف د بنسټګر عمران خان تر شا ولاړ دی.

رپوټونه وايي، د دوشنبې په سهارد تېراه په اکاخېل سیمه کې د هوایي بریدونو له امله چې په څو کورونو ترسره شول ښځې، ماشومان او لویان ووژل..

ځایي چارواکي ادعا کوي چې په هوایي بریدونو کې ویجاړ شوي کورونه د تحریک طالبان پاکستان (ټي‌ټي‌پي) د دوه قوماندانانو، امان ګل او مسعود خان له‌خوا د چاودېدونکو توکو د جوړولو لپاره کارېدل، خو عام خلک وايي، په بمبارۍ کې ملکي خلک په نښه شوي دي.

ددغه پېښې په تړاو د پاکستان امنیتي ادارو کوم غبرګون نه دی ښودلی خو د خېبر پښتونخوا حکومت دا پېښه د "ترهګرو پر ضد عملیات" یاد کړي.

ځايي خلک او ولسي استازي د حکومت ادعاوې ردوي او وایي چې د دوشنبې په شپه هوایي بریدونه شوي او بې‌ګناه خلک پکې وژل شوي دي.

د دوی په وینا، د درسو په شادلې سیمه کې پنځه کورونه په مستقیم هوایي برید کې نړېدلي او درنه مرګ ژوبله یې اړولې ده.

د وژل شویو له ډلې ۱۲ ماشومان، شپږ مېرمنې او یو سړی ټول د سیمې د مشر خیال اکبر د کورنۍ غړي وو، همدا ډول دوه نور وژل شوي کسان ځایي شپانه معرفي شوي دي.

د باړې په بازار کې د خلکو د یو لوی لاریون پر مهال، د مختلفو سیاسي ګوندونو استازو، قومي مشرانو او د سیمې د استازو ګډون وکړ او د پېښې د "بې‌پلوه قضایي پلټنې" غوښتنه یې وکړه.

د پاکستان د بشري حقونو کمېسیون هم په یوه بیان کې وویل چې د هوايي برید په ترڅ کې د ولسي وګړو وژنې ژور اندېښمن کړي او له حکومته یې د پلټنو غوښتنه وکړه.

د خېبر پښتونخوا په خپره شوې خبرپاڼه کې د وژل شویو د کورنیو لپاره لس لس میلیونه روپۍ تاوان ورکولو یادونه شوې.

خبرپاڼه وایي چې وزیراعلی علي امین ګنډاپور د سیمې له یو پلاوي سره لیدلي او ټینګار یې کړی چې: «په عملیاتو کې د ولسي خلکو وژل کېدل د خواشینۍ او غندنې وړ دي او د منلو وړ نه دي.»

د غونډې پر مهال پرېکړه وشوه چې د سیمې د منتخبو استازو، سیاسي مشرانو او قومي مشرانو په ګډون یوه جرګه د پوځ له مشرانو سره ترسره شي او د سولې او امنیت لپاره پر نوې تګلارې موافقه وشي.

ځایي سرچینو افغانستان انټرنشنل ته ویلي، چې خلکو د پښتونخوا ایالت په تېراه سیمه کې د پرونیو بمباریو د قربانیانو لپاره په باړې بازار کې لومړۍ دعا وکړه او ورسره سم دغه بازار وتړل شو او خلکو د احتجاج په ډول پرلت پيل کړ.

د سرچینو په حواله؛ پرلت ته ځایي سياسي مشرانو ویناوې پيل کړې او دغه پېښه یې غندلې ده.

سرچینو افغانستان انټرنشنل ته ویلي، چې ښایي دغه احتجاج دوام وکړي او نورو سیمو لکه په پېښور کې د کور کمانډر هاوس او نورو ځایونو ته هم وغځېږي.

پرون د پښتونخوا په تېراه ولسوالۍ کې د پاکستاني جېټ الوتکو په هوايي بمباریو کې د ښځو او ماشومانو په ګډون ۲۰ کسان وژل شوي دي. دغه ډول په دې بمباریو کې ۵ کورونه هم په بشپړه ډول ویجاړ شوي دي.

د دې پېښې په تړاو د پاکستان ځينو سیاسي مشرانو لکه محسن داوړ او اېمل ولي خان هم غبرګونونه ښودلي دي.