د پاکستان د بشري حقونو کمېسیون حقیقت موندونکې ډلې ویلي، په خېبرپښتونخوا، په ځانګړي ډول په هغه سیمو کې چې په ۲۰۱۸ کې دغه ایالات کې ادغام شوې، د دولتي واک کمزورتیا او د خلکو د ژوند خوندیتوب د جدي ګواښ سره مخ دی.
دغه پلاوی چې د پاکستان د بشري حقونو کمېسیون مشر اسد اقبال بټ یې مشري کوله، له مدني ټولنې، سیاسي مشرانو، حکومتي او امنیتي چارواکو سره لیدلي دي.
د هغوی په وینا، وسلهوال په سیمه کې ازاد ګرځي، له خلکو باج اخلي او ځوروي یې، تر دې چې ځايي خلک یوازې د ورځې تر غرمې پورې د تګ راتګ اجازه لري.
پلاوي په ځانګړې توګه د تیراه وروستۍ پېښه د اندېښنې وړ بللې، چې پکې د راپورونو له مخې له ۲۰ زیات ملکي وګړي د هوايي بمبارۍ له امله وژل شوي دي.
دغه کمېسون غوښتنه وکړه چې حکومتونه دې د پړې اچولو پر ځای شفافه پلټنه وکړي او د قربانیانو کورنیو ته دې د تاوان ورکولو پر ځای عدالت ورکړي.
په راپور کې ویل شوي چې د جبري ورکېدنو ستونزه لا هم پر ځای ده او زرګونه کورنۍ یې له ستونزو سره مخامخ دي.
همداراز، خبریالان، وکیلان او د بشري حقونو فعالان چې د ورکېدنو پر ضد غږ پورته کوي، له فشار او ځورونې سره مخ دي.
د پاکستان د بشري حقونو کمېسیون (HRCP) پلاوي په خپل راپور کې ویلي، داسې ښکاري چې یو قصدي هڅه روانه ده څو د ۲۰۱۸ کال د اساسي ادغام لاسته راوړنې بېرته وننګول شي.
د دوی په باور، دا کار به نه یوازې ټولنیز او اقتصادي پرمختګ شاته یوسي، بلکې د زیانمنو ډلو، په ځانګړي ډول د ښځو او نرښځيانو پر حقونو به هم بده اغېزه وکړي.
