د طالبانو د کورنیو چارو وزارت د افغانستان په ګوټ ګوټ کې سیمهییزو طالبانو ته امر کړی، چې د وایفای کاروونکي ونیسي، ځکه په وینا یې دوی دغه ډول انټرنېټ بند کړی او یاد کسان د سپوږمکۍ له لارې انټرنېټ ته لاسرسی موندلی او په باور یې دا کسان ډېر مهم دي او باید ونیول شي.
د طالبانو د کورنیو چارو وزارت د ایټي مسوول مولوي مسلم په یوه غږیز پیغام کې چې په خواله رسنیو کې خپور شوی وايي: «انټرنېټ دوه ډوله دی، یو په ټلیفون کې دی او بل یې په وایفای کې دی، په وایفای کې انټرنېټ موږ بند کړی دی.»
هغه وايي، وایفای هم دوه ډوله دی چې یو یې له داخلي شبکو او بل یې له فضا اخیستل کېږي او په وینا یې هغه انټرنېټ د امریکایانو لهخوا راغلی چې د سپوږمکۍ له لارې کار کوي.
نوموړي په دې غږیز پیغام کې د ټولو ولسوالیو طالبانو ته امر کړی، چې په خپلو سیمو کې وګوري چې وایفای انټرنېټ پرې شوی دی او که نه. هغه زیاته کړه: «که انټرنېټ پرې شوی نه وي، نو هغه خلک ونیسئ. هغوی ډېر مهم کسان دي، ځکه د کفارو، امریکایانو او اېلان ماسک انټرنېټ کاروي. یوه وسیله لګوي او د فضا او سپوږمکۍ له لارې انټرنېټ اخلي.»
