د طالبانو مرستیال ویاند وایي چې د بېکیفیته تېلو د مخنیوي پلاوي د ټولګټو وزارت د تخنیکي معیین په ملتیاد سالنګ لویه لاره کتلې او پرېکړه یې کړې چې یو شمېر تېل وړونکو ټانکرونو ته د تګ اجازه ور کړي. طالب چارواکي تمه ښيي، چې په دې سره به د تېلو بیې ټیټې شي.
دغه پلاوي د سړک د رغونې چارو له کتنې او له اړوندو طالب مسوولینو سره تر خبرو وروسته پرېکړه کړې چې له شمال څخه به هغه لوړ تناژ لرونکي (لسټایره) ټانکر کابل ته د تېلو د انتقال اجازه ولري، چې د نفت او ګاز دولتي شرکت د حیرتان بندر ریاست او اقینې بندر مدیریت له لارې معرفي شوي وي.
یاد پلاوي دغه راز پرېکړه کړې چې خالي ټانکرونه به د بېرته ستنېدو لپاره بدیله لار کاروي.
د طالبانو مرستیال ویاند حمدالله فطرت د پنجشنبې په ورځ (د تلې ۱۶مه) پر اېکس پاڼې لیکلي، دغه پرېکړې د دې لپاره شوې، چې د تېلو انتقال منظم، د سړک رغونې چارې خوندي او د عامو خلکو د اړتیاوو پورهکولو بهیر چټک او اغېزناک شي.
هغه زیاتوي چې د دې ګام په نتیجه کې به د تېلو بیې په کابل او سویلي ولایتونو کې راټیټې شي او د بازار ثبات به ټینګ شي.
د ټولنیزو شبکو یو شمېر کاروونکو افغانستان انټرنشنل ـ پښتو ته ویلي، چې له تېرو دریو ورځو راهیسې انټرنېټ کمزوری شوی او فیسبوک، انسټاګرام، ټویټر او نور ې ټولنیزې شبکې په سختۍ د استفادې وړ دي.
له کندهار څخه یو شمېر کسانو داسې انځورونه لېږلي چې ټولنیزې پاڼې محدودې شوې ښيي.
د میرویس په نوم د کندهار یو اوسیدونکي افغانستان انټرنشنل ته وویل:«فیسبوک او انسټاګرام کې عکسونه او ویډیوګانې یا پر مخ نه ښکاري او یا هم کله کله یو عکس ښکاره شي، خو لیکنې پکې ښکاري.»
په کندهار کې د ملا هبت الله په مشرۍ د ۳۴ ولایتونو د والیانو او ولسوالانو له درې ورځنۍ غونډې سره هممهاله پر انټرنېټ محدودیت و لګېد.
د کابل یو اوسیدونکي افغانستان انټرنشنل ته ویلي، چې خصوصي انټرنېټ شبکو کې هم د فیسبوک، انسټاګرام او نورو اپلیکیشنونه فلټر کېږي او له VPN پرته په سمه توګه د استفادې وړ نه دي.
نوموړی چې نه غواړي نوم یې واخېستل شي وايي:«ډیری کسان د ټیکټاک، سناپ چټ، انسټاګرام او نورو اپلیکیشنونو لپاره له VPN څخه استفاده کوي، خو هغه هم قوي انټرنېټ ته اړتیا لري. انټرنېټ سخت ضعیف شوی دی.»
په افغانستان کې د انټرنېنټ د خراب کیفیت او د طالبانو له خوا د انټرنېنټ او ټولنیزیو شبکو د فلټر کولو له امله خلک شکایت کوي، چې کاروبار ته یې زیان اوښتی دی.
عام خلک او کاروباري وګړي له طالبانو غوښتنه کوي، چې د انټرنېټ پر استعمال لګول شوي محدودیتونه لرې کړي.