د بلوچستان د اطلاعاتو پخوانی وزیر جان اڅکزی وايي، پاکستان له افغانستان سره پر ډیورنډ کرښه د داعش او نورو ترهګرو پر پټنځایونو بریدونه کړي دي. نوموړی زياتوي، چې پاکستان د افغان طالبانو په غبرګون شدید ځوابي بریدونه پيل کړي دي.
جان اڅکزي ادعا کړې، چې افغان طالبانو د جګړې له سیمې شاتګ کړی. نوموړی وایي، چې د پاکستان بریدونه د دقیقو معلوماتو پر بنسټ تر سره کېږي.
په ورته وخت کې طالبانو هم ویلي، چې د ډیورنډ کرښې پر اوږدو د طالبانو او پاکستاني ځواکونو تر منځ نښتې د څو ولایتونو په اوږدو کې پراخې شوې دي.
د طالبانو دفاع وزارت سرچینو ویلي، دا جګړې تعرضي بڼه لري او په کابل کې د پاکستان د هوايي برید په ځواب کې تر سره کېږي.
