د پاکستان د بهرنیو چارو وزارت د افغانستان او هند د ګډې اعلامیې چې د امیرخان متقي او د هند د بهرنیو چارو وزیر له لیدنې وروسته د جمعې په ورځ (د تلې ۱۸مه) خپره شوه، د ځينو برخو په اړه د اندېښنې له څرګندولو سربېره خپل اعتراض په اسلاماباد کې د طالبانو سفیر ته سپارلی دی.
د پاکستان د بهرنیو چارو وزارت د شنبې په ورځ (د تلې ۱۹مه) د یوې اعلامیې په خپرولو سره ویلي، د هند او افغانستان په ګډه اعلامیه کې «جمو کشمیر» د هند خاوره بلل شوې، په داسې حال کې چې د یادې سیمې اوسېدونکي د خپل مشروع حق یعنې د ځان ارادیت لپاره مبارزه کوي.
له دې سره سم، پاکستان د طالبانو د بهرنیو چارو وزیر امیرخان متقي هغه څرګندونې هم رد کړې، چې ګواکې «ترهګري» د پاکستان داخلي ستونزه ده. د دغه هېواد د بهرنیو چارو وزارت په دې تړاو وايي، اسلاماباد هغه شواهد او معلومات له افغانستان سره شریک کړي چې «فتنه خوارج او فتنه هندوستان» ترهګرو ډلو د افغانستان له خاورې د پاکستان پر ضد د فعالیتونو او دا چې د ځانګړو کړیو ملاتړ هم له ځانه سره لري، ښکارندويي کوي.
پاکستان په ټينګار سره ویلي، چې د ترهګرۍ د کنټرول مسوولیت پر پاکستان اړول، د افغانستان د لنډ مهالي حکومت له اوږو څخه د سیمې د سولې او ثبات د ساتنې مسوولیت نهشي لرې کولای.
اعلامیه کاږي، پاکستان د یوه سوله ییز او سوکاله افغانستان غوښتونکی دی او په همدې موخه پاکستان له افغانستان سره د سوداګرۍ، اقتصاد او ټرانزیت په برخو کې هر ډول ممکنه اسانتیاوې برابرې کړي، څو د دواړو هېوادونو ترمنځ همکاریو او ټولنیز ـ اقتصادي پرمختګ ته لاره هواره شي.
پاکستان همداراز له طالبانو غوښتي، چې د دغه هېواد د امنیت په برخه کې ورسره همکاري وکړي او په عملي اقداماتو سره دې اجازه ورنهکړي، چې افغان خاوره د «فتنه خوارج او فتنه هندوستان» د ترهګرو له خوا د پاکستان پر ضد وکارول شي.
سره له دې چې طالبانو لا تر اوسه د پاکستان دغو تازه څرګندونو ته څه غبرګون نه دی ښودلی، خو تر دې مخکې یې په وار-وار ویلي، چې په پاکستان کې امنیتي ننګونې د دغه هېواد داخلي ستونزه ده او همداراز یې په ډاګه ویلي، هېڅ ترهګره ډله په افغانستان کې نشته او هېڅ فرد او یا ډلې ته د دې اجازه نه ورکوي، چې افغان خاوره د بل هېواد پر ضد وکاروي.
