د افغانستان رسنیو ملاتړ سازمان د فېسبوک کمپنۍ لهخوا د یو شمېر افغان خبریالانو د اکونټونو تړلکېدل «یو اندېښمنوونکی او پر بیان ازادۍ جدي ګوزار» بللی دی. له څو ورځو راهیسې د یو شمېر هغو افغان خبریالانو اکونټونه تړل شوي، چې له هېواده د باندې مېشت دي.
دغه سازمان د یوې خبرپاڼې په خپرولو سره ویلي، فېسبوک کمپنۍ (میټا پلټفورم) په دې وروستیو ورځو کې د یو شمېر هغو افغان خبریالانو چې له هېواده بهر د رسنیو او ټولنیزو شبکو له لارو د افغانانو د حقایقو، ستونزو او انساني وضعیت غږ نړۍ ته رسوي بند کړي دي.
فېسبوک کمپنۍ لا تر اوسه د یادو افغان خبریالانو د فېسبوک اکونټونو د بندښت په تړاو هېڅ رسمي دلیل نه دی وړاندې کړی او خبریالانو ته هم د وضاحت غوښتنې حق نه دی ورکړل شوی.
خبرپاڼه کاږي: «دا اقدام نه یوازې د خبریالانو د حقونو او د هغوی د مسلکي کار خنډ ګرځي، بلکې د بیان ازادۍ، د معلوماتو د لاسرسي او د ډېموکراسۍ ارزښتونو له اصولو سره هم په څرګنده توګه په ټکر کې دی.»
د افغانستان رسنیو ملاتړ سازمان له فېسبوک کمپنۍ څخه غوښتي، چې په لومړي سر کې د یادو افغان خبریالانو تړل شوي اکونټونه ژر تر ژره فعال کړي ګنې د دغې پرېکړې شفاف دلیلونه وړاندې کړي او یا هم هغه پالیسۍ دې بیا وارزوي چې د بیان ازادۍ د محدودېدو لامل شوې دي.
د یاد سازمان په وینا، افغان خبریالان د معلوماتو د ازاد بهیر، د خلکو د غږ رسونې او د ځوابویلو د کلتور د ټینګښت لپاره کار کوي او «د هغوی خاموشهکول، د ټول ملت خاموشهکول دي.»
په بهر کې مېشت یو شمېر فعال افغان خبریالان وايي، پرته له دې چې د فېسبوک پالیسۍ خلاف کوم کار یې کړی وي، فېسبوکونه یې بند کړای شوي دي.
د امریکا ولسمشر ډونالډ ټرمپ د اسراییل او حماس تر منځ د جګړې پای ته رسېدو ته په اشارې سره ویلي، دا اتمه جګړه ده چې حل کړې یې ده. ټرمپ له دغې موضوع سره جوخت وویل: «اورېدلي مې دي چې د پاکستان او افغانستان تر منځ هم جګړه روانه ده، خو اوس بوخت یم.»
ډونالډ ټرمپ منځني ختیځ ته د خپل سفر پر مهال په «اېر فورس ون» الوتکه کې له خبریالانو سره په خبرو کې ویلي: «اورېدلي مې دي چې د پاکستان او افغانستان تر منځ هم جګړه روانه ده. باید صبر وکړم، څو بېرته راستون شم.» هغه همداراز یې زیاته کړه، اوس د یوې بلې جګړې پر حلولو بوخت دی وروسته به دغې موضوع ته سر ورښکاره کړي.
هغه همداراز په ډاګه کړه، د څو کلنو جګړو په پای ته رسولو او د سولې په ټينګښت سره یې میلیونونه کسان ژغورلي او دغه کار یې هم د نوبل د سولې جایزې د ترلاسه کولو لپاره نه دی کړی، بلکې د انسانانو د ژغورنې لپاره یې کړی دی.
د پاکستان او افغان طالبانو تر منځ د جګړې اور وروسته له هغې بل شو، چې د پاکستان هوايي ځواکونو د تېرې پنجشنبې د تلې ۱۷مه د افغانستان پر پلازمېنه کابل او پکتیکا بمبار وکړ. پاکستان پرته له دې چې په رسمي توګه د یاد برید مسوولیت ومني، ویې ویل چې د پاکستان د خلکو د امنیت لپاره هر هغه کار چې لازم وي کوي یې.
په هغه وخت کې د طالبانو دفاع وزارت یاد برید بې ساری، له تشدد څخه ډک او کرغېړن او له خپل حریم څخه یې دفاع خپل حق وباله او خبرداری یې ورکړ، که له دې وروسته وضعیت هر څومره ترینګلی کېږي مسوولیت به يې د پاکستان پوځ پر غاړه وي.
د طالبانو د امر بالمعروف وزیر خالد حنفي په هلمند کې د محتسبینو په یوې ناسته کې هغوی ته واک ورکړی، چې که د دغې ډلې ملکي یا نظامي مسوولین له قانون څخه سرغړونه وکړي، ونیسي او بندیان یې کړي. هغه ویلي: «د مظلوم شکایت واورئ او د اسلامي شریعت د صلاحیت له مخې اقدام ترسره کړئ.»
د طالبانو د امر بالمعروف وزارت سرپرست خالد حنفي په هلمند کې محتسبینو ته په یوه بیان کې د امر بالمعروف غړو ته واک ورکړی، څو هغه کسان ونیسي او محکمې ته یې راجع کړي، چې د دوی له قانون څخه سرغړونه کوي.
حنفي ویلي: «که هر څوک وي، که د لوا مسوول وي، د کنډک مسوول وي، قوماندان وي، د استخباراتو مسوول وي، د محکمې قاضي وي او که د ولایت والي وي، نو د امر بالمعروف غړي صلاحیت لري چې هغوی له ګرېوانه را ونیسي او د خپل منشور له مخې یې محاکمه کړي.»
د طالبانو د امر بالمعروف وزیر همداراز وایي، که هر مسوول کس ظلم کوي او یا هم «د دین او جهاد» له نوم څخه استفاده کوي، محتسبین کولی شي چې هغوی تر ګرېوانه را ونیسي او زنداني یې کړي.
هغه خپلو محتسیبانو ته په خطاب کې ویلي، چې تاسو ته دغه صلاحیت «الله ج او اسلامي نظام» درکړی او باید د مظلوم شکایت حل کړای شي.
د پاکستان د بهرنیو چارو وزارت د ډیورند کرښې په اوږدو کې د پاکستاني ځواکونو او افغان طالبانو تر منځ د تېرې شپې له جګړې وروسته وايي، اسلاماباد دا هیله لري چې یوه ورځ افغان ولس له فشارونو ازاد او د یوه ریښتیني حکومت مالکان شي. شنونکي بیا دغه څرګندونې پارونکې ګڼي.
د پاکستان د بهرنیو چارو وزارت د یکشنبې په ماښام (د تلې ۲۰مه) د ډيورند کرښې په اوږدو کې د تېرې شپې جګړې په تړاو د اندېښنې په څرګندولو سره ویلي، په افغان لوري کې له طالبانو سربېره «فتنه خوارج او فتنه هندوستان» هم شامل و.
دغه وزارت د یوې خبرپاڼې په خپرولو سره د افغان طالبانو او پاکستاني ځواکونو تر منځ د تېرې شپې جګړه غېر ضروري بللې او په وینا یې په دې سره به د دواړو هېوادونو اړیکې ترینګلې شي.
د پاکستان د بهرنیو چارو وزارت وايي، اسلاماباد د یوه سوله ییز، سوکاله، ټولګډونه او د سیمې له هېوادونو سره په اړیکه کې د افغانستان غوښتونکی دی. د دغه وزارت په خبرپاڼه کې راغلي، «موږ دا هیله هم لرو چې یوه ورځ به د افغانستان ولس له فشارونو ازاد او د یوه ريښتیني حکومت له لوري اداره شي.»
د پاکستان د بهرنیو چارو وزارت له دغې خبرپاڼې مخکې یعنې نن سهار (یکشنبه د تلې ۲۰مه) د طالبانو ویاند ذبیحالله مجاهد د ډیورند کرښې په اوږدو کې د شوې جګړې په تړاو ځانګړي خبري کنفرانس کې په ډاګه وویل، پاکستان د افغانانو په منځ کې ډول ډول توپیرونو ته لمن وهي او غواړي چې ځینې افغانان په خپل دام کې راګیر او بیا یې د افغانستان د ملي امنیت پر ضد وکاروي.
د ذبیحالله مجاهد ځانګړی خبري کنفرانس
د پاکستان د بهرنیو چارو وزارت له طالبانو غوښتي، چې هېڅ ډلې ته اجازه ورنهکړي چې افغان خاوره د بل هېواد پر ضد وکارول شي.
د طالبانو ویاند ذبیحالله مجاهد بیا ویلي، د افغانستان په ټوله خاوره کې هېڅ ډول ګواښ نشته او په تېرو اتو میاشتو کې کومه د پام وړ سیاسي امنیتي پېښه نه ده را منځته شوې او له هغې مخکې کوم لوی او واړه بریدونه چې په افغانستان کې شوي، هغه د افغانستان په ګاونډ کې د فتنې او فساد له مرکزونو څخه تنظیم او ترسره شوي وو او په وینا یې د هغو ټول عاملین یا نیول شوي او یا هم وژل شوي دي.
د پاکستان د بهرنیو چارو وزارت وايي، د خپل ځان د دفاع له حق څخه په ګټې اخیستنې سره یې په تېره شپنۍ جګړه کې طالبانو او «اړوندو خوارجو» ته ګڼه مرګ ژوبله اړولې او همداراز یې هغه تاسیسات هم لهمنځه وړي چې د پاکستان پر ضد د ترهګریزو بریدونو د طرحه کولو لپاره ترې استفاده کېده.
په خبرپاڼه کې راغلي، پاکستان خبرو اترو او ډيپلوماسۍ او همداراز له افغانستان سره د دوه اړخیزو ګټو پر بنسټ اړیکو ته ارزښت ورکوي او په هند کې د امیرخان متقي هغه څرګندونې چې په افغانستان کې هېڅ ترهګره ډله نشته هم رد کړې او ادعا یې کړې، چې په افغان خاوره کې ترهګر پټنځایونه لري او په ازادانه توګه فعالیت کوي.
د دغې خبرپاڼې لهمخې، پاکستان په افغانستان کې د «فتنې خوارجو او فتنې هندوستان» د موجودیت او له هغه ځایه د فعالیتونو په تړاو خپلې اندېښنې شریکې کړي او له طالبانو یې غوښتي، چې د ترهګرو عناصرو پر وړاندې جدي او د تایید وړ اقدمات وکړي.
د طالبانو ویاند ذبیحالله مجاهد بیا وايي، په افغانستان کې هېڅ ترهګره ډله نشته او داعش هم په پوره قوت سره ځپل شوی او په وینا یې پاکستان په خپله خاوره کې د داعش پروژې پر موجودیت او پټنځایونو سترګې پټې کړي او د هغو په وسیله خپل دیني علماء او خلک وژني او همداراز د افغانستان او هم د نړۍ امنیت او ثبات پرې ګواښي او په باور یې «پاکستان خطرناکه لوبه پیل کړې ده.»
د مجاهد په وینا، داعش څو کاله مخکې د ډیورند کرښې ها خوا په اورکزیو ساحه کې سر راپورته کړ او مشري هم د سعید خان په نوم د یوه پاکستاني پر غاړه وه او پر کابل د طالبانو له واکمنۍ مخکې او وروسته دغه ډله د دوی له لوري ځپل شوې او اوس په خېبرپښتونخوا او بلوچستان کې خپلو اصلي سیمو ته تښتېدلي او هلته یې نوي پټنځایونه او مرکزونه جوړ کړي او له نورو هېوادونو استخدام شوي کسان د پاکستان له لوېدیځې پولې او د کراچۍ او اسلاماباد له هوایي ډګرونو خپلو یادو مرکزونو ته لېږدوي او له روزنې وروسته بیا یې افغانستان او نورې نړۍ ته د ترهګریزو بریدونو په موخه استوي.
ذبیحالله مجاهد زیاتوي، «زموږ د اطلاعاتو لهمخې د داعش د خراسان څانګې مشر شهاب المهاجر او د ده نږدې همکاران عبدالحکیم توحیدي، سلطان عزیز عزام او د داعش له مرکزي څانګې سره د اړیکو تنظیموونکی او په اصطلاح د مکتب صدیق مسوول صلاح الدین رجب د پاکستان په خاوره کې موجود دي، افغانستان په جدي توګه غوښتنه کوي چې دا اشخاص باید اسلامي امارت ته وسپارل شي.»
مجاهد همداراز له پاکستان څخه غوښتي، که یاد کسان دوی ته نه سپاري نو لږ تر لږه دې باید له خپلې خاورې وباسي او په دې توګه دې خپل مسوولیت ترسره او خپلې ژمنې پوره کړي.
پاکستان له یادو جګړو وروسته خبرداری ورکړی، چې تر دې وروسته به په خپله خاوره کې له قوانینو سره سم د افغان کډوالو په تړاو اقدامات وکړي. دمګړی په پاکستان کې شاوخوا ۴ میلیونه افغانان شپې او ورځې تېروي. په دې سره په پاکستان کې مېشت یو زیات شمېر افغانان په وېره کې دي چې ګنې له یادو نښتو وروسته به له دوی سره ناسم چلند لاپسې بد شي.
د طالبانو ویاند ذبیحالله مجاهد بیا خبرداری ورکړی، چې پاکستان باید د افغانستان پر وړاندې له منفي چلند، د حریم نقضولو او نورو پارونکو کړنو لاس پر سر شي، ګنې یادې کړنې به په طبیعي ډول خورا منفي او نا مطلوب عواقب ولري.
