د بالیووډ نامتو او میلیادر ستوری شاهرخ خان چې د میر تاج محمد خان او فاطمې زوی دی، د ۱۹۶۵ کال د نومبر پر دویمه په نوي ډیلي کې زېږېدلی دی. پلار یې په پېښور کې اوسېده او د هند د خپلواکۍ غورځنګ یو فعال و او د هند له وېشل کېدو وروسته نوي ډيلي ته کډوال شو.
شاهرخ خان خپلې لومړنۍ زده کړې په نوي ډیلي کې پیل کړې او بیا یې همداسې خپلو لوړو زده کړو ته دوام ورکړ.
هغه په لومړي سر کې په ټلوېزیوني تیاتر او بیا یې په ۸۰یمه لسیزه کې هنري برخې ته مخه کړه او ډېر ژر بیا د بالیووډ په ډګر کې وځلېد.
شاهرخ خان چې اوس د بالیووډ یو له تر ټولو غوره او محبوبو سینمايي لوبغاړو ګڼل کېږي، د «بالیووډ د پاچا» په لقب هم مشهور دی.
هغه تر اوسه په څه باندې ۸۰ فلمونو کې په دواړو رولونو (منفي او مثبت) کې کار کړی دی. د شاهرخ خان د فلمي ژوند او لومړنۍ بریا په منفي رول کې وه. هغه په ۱۹۹۳ کال کې «ډر» فلم کې په منفي رول کې راڅرګند شو، خو په ۱۹۹۵ کال کې یې ریکارډ ماتونکي فلم «دلوالې دلهنیا لې جاینګې» کې د رومانټيک رول له امله د خپل شهرت اوج ته ورسېد او ورسره یې د «رومانس پاچا» لقب هم خپل کړ.
شاهرخ خان په ۲۰۰۵ کال کې د هند دولت له لوري د «پادما شري» جایزه هم ترلاسه کړه او ورسره یې ګڼ نورې جایزې هم خپلې کړې دي او همداراز د نړۍ په کچه په پنځوسو نفوذ لرونکو کسانو کې شمېرل کېږي.
هغه په ۱۹۹۱ کال کې د فلمونو له جوړوونکې او طراحې ګوري خان سره واده وکړ او د ارین، سوهانا او ابرام په نومونو دو زامن او یوه لور لري.
شاهرخ خان له فلمي نړۍ ور هاخوا د لویو ټلوېزیوني او فېسټيوالونو کوربتوب هم کوي او ورسره هم مهاله د هند په غورله لیګ کې د یوې لوبډلې مالک هم دی.
د شاهرخ خان نوم د لومړي ځل لپاره د روان کال په اکټوبر میاشت کې د میلیاردرانو په نوملړ کې شامل شو. د دې نوي نوملړ له مخې شاهرخ خان اوس د نړۍ له شتمنو فلمي ستورو یو دی.
د شتمنو هندیانو یو نوملړ چې د «هورون انډیا» په نامه یادېږي، د معلوماتو لهمخې یې د شاهرخ خان د شتمنۍ کچه ۱ اعشاریه ۴ میلیاردو امریکايي ډالرو ته رسېږي.
هغه په څه باندې ۳۰ کلن سینمايي مزل کې په څه باندې ۸۰ فلمونو کې کار کړی او وروستي دوه فلمونه یې چې پټان او جوان نومېږي، ډېر ځلېدلي او ویل کېږي چې لا هم خپل هنر ته ژمن دی او له خپلو نورو سوداګریزو چارو هنري چارو ته دوام ورکوي.
د اسراني د مړینې خبر د هغه مدیر «بابو بهاي تیبا» تایید کړی او ویلي یې دي، چې اسراني د دوشنبې په ماسپښین درې بجې په ممبي کې په «اروګیا نیدهي» روغتون کې له نړۍ څخه سترګې پټې کړې.
د هغه کورنۍ په انسټاګرام پاڼه کې په خپره شوې اعلامیه کې لیکلي: «زموږ ګران، هغه څوک چې د هر چا پر مخ یې موسکا راوسته، اسراني صاحب نور زموږ تر منځ نشته. دا نه جبرانېدونکی زیان دی، هم د هند سینما لپاره او هم زموږ د زړونو لپاره. هغه نښه چې اسراني د خپلو هنري کارونو له لارې پرې اېښې، دا به تلپاتې وي. خدای دې د هغه روح ته ارام ورکړي.»
اسراني د ۱۹۴۱م کال د جنورۍ پر لومړۍ نېټه د راجستان په جېپور ښار کې زېږېدلی و.
هغه خپله دنده په «هند راډيو» کې د ډوبلې (غږ) په برخه کې پیل کړه. وروسته یې د تمثیل روزنه د «ساهتیه کلا بهایي تکر» تر لارښوونې لاندې واخیسته او په ۱۹۶۲کال کې ممبي ته ولاړ څو د سینما په نړۍ کې خپل ځای ومومي.
نوموړی په ۱۹۶۶کال کې د «فلم او ټلوېزیون د انسټیټوټ» څخه فارغ شو، خو د کار پیل ورته اسانه نه و.
له څو وړو رولونو وروسته هغه د فلم جوړونکي «هریشکیش موکرجي» له خوا د فلم « ګډي» لپاره غوره شو، چې دا فلم د هغه د هنري ژوند مهم پړاو وګرځېد.
اسراني وروسته په ګڼو بریالیو فلمونو کې راښکاره شو، لکه شعلې، باورچي، چپکې چوپکې او نور.
خو د هغه تر ټولو پېژندل شوی رول د «شعلې» فلم د بندیخاني چارواکي کومیډي رول و، چې تر نیمې پېړۍ وروسته هم د خلکو په ذهن کې ژوندی پاتې دی.
هغه یو وخت یوې رسنۍ سره په مرکه کې ویلي وو: «د شعلې فلم د پنځوسو کلونو په پوره کېدو سره زه دا ویلای شم چې هېڅ داسې محفل نشته چې خلک دې زما هغه ډیالوګونه ونه غواړي. دا د رېمش صیب د غوره لارښوونې او د سلیمجاوېد د لیکنې برکت دی».
اسراني د خپل ژوند په اوږدو کې شپږ فلمونه هم جوړ کړي وو او وروستی ځل د ۲۰۰۳کال په کومیډي فلم «نان سټاپ دمال) کې راښکاره شوی و.
د هغه د جنازې مراسم د دوشنبې ماښام په ممبي کې د سانتاکروز په هدیره کې ترسره شول.
د اسراني کومیډي رولونه د نورې نړۍ ترڅنګ په افغانستان کې هم ځانګړي مینهوالو لري.
د یادولو وړ ده، چې د مړینې څو ساعته وړاندې اسراني د «دیوالي جشن» د مبارکۍ پیغام هم له خپلو مینهوالو سره شریک کړی وو. هغه لیکلي وو «دیوالي مو بختوره شه.»
