د اسلامي همکاریو سازمان عمومي منشي حسین ابراهیم طه د دوشنبې په ورځ د دې سازمان له غړو هېوادونو او مرستندویه ادارو وغوښتل، چې د افغانستان د شمالي ولایتونو د زلزلې زیانمنو خلکو ته بېړنۍ مرستې برابرې کړي.
نوموړي دغه راز له افغانستان سره د همغږۍ څرګندونه وکړه او غوښتنه یې وکړه، چې هېوادونه دې خپلې مرستې له طالب چارواکو او زلزله ځپلو سیمو کې له مرستندویه سازمانونو سره په همغږۍ ووېشي.
دا په داسې حال کې ده، چې تر اوسه پورې جاپان، هند او ایران د افغانستان لپاره د بېړنیو مرستو د لېږلو چمتووالی اعلان کړی دی. ګڼو هېوادونو بیا د طالبانو د ادارې تر تحریم لاندې اوسېدو او د نړۍوالې انزوا له امله د بېړنیو مرستو او د ژغورنې ټیمونو له استولو ډډه کړې ده.
