د پنجاب د بهاولپور په سیمه کې پولیسو ۱۲ افغان ډاکټران او د طب پنځه محصلین نیولي او له تېرې ورځې راهیسې یې بندیان کړي دي. نیول شوي کسان وایي، کورنۍ یې اندېښمنې دي او په اسلاماباد کې یې خپله ستونزه د طالبانو له سفارت سره هم شریکه کړې، خو تر اوسه هېڅ اقدام نه دی شوی.
د طبي برخې یو شمېر کارکوونکو او محصلینو د چهارشنبې په ورځ (د لړم ۱۴مه) افغانستان انټرنشنل ـ پښتو ته ویلي، چې پنځه افغان محصلین د قائداعظم په طبي پوهنتون کې زدهکړې کولې او ۱۲ افغان ډاکټران د همدې پوهنتون اړوند د تخصص پروګرام ترسره کوي.
د همدې کسانو له ډلې ډاکټر شمشاد شینواري زیاته کړې: «تېره ورځ ناڅاپه امنیتي چارواکي راغلل، موږ یې له کالج او روغتون دواړو را واېستلو او د ښار په بل سیول روغتون کې یې بندیان کړو. هغوی وویل، چې موږ د ویزې د نشتوالي له امله نیول شوي یو.»
د پوهنتون یوه چارواکي چې نه یې غوښتل نوم یې واخیستل شي، پېښه تایید کړې او ویلي یې دي: «لوړو چارواکو ورته امر کړی چې ترڅو ستونزه حل شوې نه وي، له رسنیو سره خبرې ونه کړي.»
هغه زیاته کړې: «موږ ته ښکاري چې ستونزه په کار کې نه ده، بلکي د ویزې په اسنادو کې ده. موږ ته ویل شوي چې دا کسان باید تر هغې محاصره پاتې شي څو قانوني تصدیق یې بشپړ نه شي.»
د ډاکټر شمشاد په خبره، دوی پاکستان ته له قانوني اسنادو سره راغلي او د ویزې د تمدید لپاره یې غوښتنلیکونه هم وړاندې کړي، خو تر اوسه یې مثبت ځواب نه دی تر لاسه کړی.
نوموړی همداراز زیاتوي: «موږ د دې موضوع په اړه په اسلاماباد کې د طالبانو له سفارت سره د اړیکو نیولو هڅه کړې، خو تر اوسه یې هېڅ ځواب نهدی راکړی.»
د یادونې وړ ده، چې په دې وروستیو کې د افغانستان او پاکستان اړیکې یو ځل بیا ترینګلې شوې دي، چې له همدې امله نه یوازې د دواړو هېوادونو ترمنځ د تګ راتګ لارې تړل شوې، بلکې زرګونه کسان هم په جبري ډول له دغه هېواده اېستل شوي دي.
د راپورونو له مخې، په نیول شویو او اېستل شویو کسانو کې د مدني ټولنې غړي، د پخواني جمهوري حکومت کارکوونکي چې ژوند یې له ګواښ سره مخ دی او همدارنګه ځينې خبریالان هم شامل دي.
په پېښور کې د افغانستان انټرنشنل ـ پښتو د خبریال جواد شینواري د معلوماتو له مخې، یوازې په تېرو څلورو ورځو کې د تورخم له لارې شاوخوا ۱۸ زره افغانان اېستل شوي دي.
د څارونکو په وینا، دا ډول پېښې کولای شي د دواړو ګاونډیو هېوادونو ترمنځ د همکارۍ فضا لا پسې زیانمنه کړي.
د لوبډلې د هرکلي ویډیوګانې او انځورونه په ټولنیزو رسنیو کې پراخ او مثبت غبرګونونه راپارولي دي. ګڼ شمېر افغانانو دا صحنې د «افغان ولس د یووالي، غرور او مینې» ښکلی انځور بللی دی.
د طالبانو د المپیک، بدني روزنې او سپورټ لوی رییس احمدالله وثیق پر اېکسپاڼه لیکلي، د خوست او پکتیا د خلکو دا پراخ هرکلی د ولس او ورزش ترمنځ د پیاوړې اړیکې څرګندونه کوي. نوموړي زیاته کړې، چې دا ملاتړ د افغان اتلانو لپاره د نوې انګیزې او هڅونې سرچینه ده.
د پښتون ژغورنې غورځنګ مخکښ غړي حنیف پښتین په دې تړاو ویلي دي: «کرېکټ، فوټبال، فوټسال او نورې ټولې لوبې اوس د ملتونو لپاره یوازې لوبې نه دي. ملتونه، په ځانګړي ډول افغانان د دې لوبو له لارې د کور دننه د ملي یووالي روحیه پیاوړې کوي او له هېواده بهر د عظمت رتبه ګټي.»
هغه زیاته کړې، چې د خوست او پکتیا د خلکو دا ملي احساس د افغانستان د واقعي ځواک څرګندونه کوي.
د خوست یو شمېر ځوانانو ویلي، د ملي لوبډلو بریاوې هغوی ته د راتلونکي لپاره د هڅونې، باور او وطنپالنې الهام ورکوي. یو تن ګډونوال ویلي: «موږ وینو چې زموږ اتلان د نړۍ په ډګرونو کې د افغانستان نوم پورته کوي، دا موږ ته د امید او افتخار احساس راکوي.»
افغانې خبریالې فرحناز فروتن پر اېکسپانه لیکلي: «په تېرو شلو کلونو کې هېڅ صحنه د پکتیا او خوست د خلکو د هرکلي په اندازه اغېزمنه نه وه. زرګونه مشاوران، میلیاردونه ډالر او بېشمېره ویناوو نتیجه ورنه کړه، تریخ حقیقت دا دی چې د جمهوریت سیاستوالو یو ځل بیا طالبانو ته وبایلله او د افغانستان خلکو ته یې هره ورځ بایلي.»
د طالبانو د اقتصاد وزارت مسلکي مرستیال ډاکټر لطیف نظري د افغان ورزشکارانو رول ستایلی او ویلي یې دي: «ورزشکاران د سولې، ورورولۍ او ملي یووالي استازي دي. دوی د ټولنې په یوځای کولو، مثبت فکر خپرولو او د افغانستان د عزت د بېرغ پورته ساتلو کې مهم رول لري.»
هغه په خپلو څرګندونو کې ټینګار کړی، چې د ورزش له لارې د افغان ملت یووالی پیاوړی کېږي او د ځوانانو انرژي د سولې، پرمختګ او ملي غرور په لور رهبري کېږي.
د پخواني ولسمشر ویاند شاه حسین مرتضوي په دري ژبه لیکلي: «چه کسی می خواهد من و تو ما نشویم ؟» مانا دا چې څوک غواړي چې زه او ته موږ نه شو؟ هغه د خوست او پکتیا ولس ستایلی دی.
پاکستان کې د افغانستان پخواني سفیر عاطف مشعل په خوست او پکتیا کې د فوټسال د ملي لوبډلې هرکلی د ملي یووالي ژوندی انځور یاد کړی او ویلي یې دي: «دا ولس د غرور ولس دی، نه د تسلیمېدو.»
د ولسي جرګې پخواني استازي کمال ناصر اصولي لیکلي: «موږ د هېواد له هر هغه زوی سره مینه لرو، چې د افغانستان لپاره افتخار راوړي.»
سیاسي شنونکي بسمالله تابان بیا ویلي: «که سیاستوال خلکو ته د عادي ژوند اجازه ورکړي، د افغانستان د خلکو دا ډول ښکلی او رښتینی انځور به تل ووینو.»
دا په داسې حال کې ده، چې له خوست او پکتیا مخکې په کابل کې هم د فوټسال د ملي لوبډلې شانداره هرکلی شوی و.
پرون هم په کابل کې د عزیزي سوداګریز ګروپ مشر میرویس عزیزي د افغانستان ۱۷ کلنه فوټسال ملي لوبډله د یوې غونډې پر مهال وستایله او د یو میلیون افغانیو جایزه یې هم ورکړه.
یاده دې وي، چې د افغانستان د ۱۷ کلنو فوټسال ملي لوبډلې د روان کال د لړم په ۹مه نېټه د ایران لوبډلې ته ۲ پر ۱ ماتې ورکولو سره د لومړي ځل لپاره د اسیا د فوټسال د اتلولۍ جام ترلاسه کړ.