د رویټرز یوه خبریاله او یو امنیتي سلاکارهم د برید پر مهال ټپیان شوي دي. برید کوونکو لرګي او غټې تېږې کارولې. دا پېښه د “بیتا” کلي ته نږدې شوې، چې د نابلس ښار سوېل لور کې موقعیت لري.
یاده سیمه په تېرو کلونو کې د مېشت شويو کسانو د بریدونو ځای پاتې شوی او دا ډول بریدونه له هغه راهیسې زیات شوي، چې د غزې جګړه دوه کاله وړاندې پیل شوه. سږکال د زیتونو د راټولولو د موسم له پیل راهیسې هم دغه بریدونه لا زیات شوي دي.
لکه څنګه چې دا ډول بریدونه ډېر شوي، اسرایيلي او بهرني فعالان ډېری وخت د فلسطینیانو ترڅنګ ولاړ وي، څو د دوی د زیتونو د حاصلاتو حق وساتي او د هر ډول تاوتریخوالي مستندونه ثبت کړي. فعالان یا محلي فلسطینیان خبریالانو ته د راټولولو د پلانونو خبر ورکوي، څو هغوی حاضر وي او راپور ورکړي په ځانګړي ډول د هغو سیمو په اړه چې ګواښمن ګڼل کېږي.
د مېشت شويو کسانو مېشتځای معمولاً د کانتینرونو یا کوچنیو ودانیو ټولګه وي، خو د اسراییلي چارواکو رسمي تصویب نه لري. فلسطینیان او ډېری هېوادونه دا ډول مېشتځایونه د نړۍوالو قوانینو له مخې غېرقانوني ګڼي، خو اسراییل له دې نظر سره مخالف دی.
د اسراییل دفاعي ځواک ویلي، چې هغوی د پېښې د راپور تر ترلاسه کولو وروسته سرتېري سیمې ته لېږلي، خو عیني شاهدان وايي، هلته یې هېڅ سرتېري نه دي لیدلي.
د پوځ ویاند رویټرز ته وویل: «دفاعي ځواک هر ډول تاوتریخوالی غندي او د امنیت او نظم د ساتنې لپاره به خپل فعالیت ته دوام ورکړي.»
هغه زیاته کړه، چې پولیس به د پېښې لا نور جزیات وڅېړي.
عیني شاهدان وايي، شاوخوا ۳۰کلیوال او فعالان او نږدې ۱۰خبریالان د زیتونو د راټولولو لپاره راټول شوي وو، چې ناڅاپه له غونډۍ څخه راښکته شوي ګڼ شمېر نقابپوشه مېشت شويو کسانو پرې برید وکړ. هغوی د لرګیو سره خلک ووهل او د رویټرز انځور اخیستونکې «رنین سوافته» یې پرلهپسې ووهله، په داسې حال کې چې هغې هڅه کوله ځان وساتي.
عیني شاهدان زیاتوي چې نږدې ۵۰ نقاب پوښه کسان و چې پر سوافته یې بېرحمانه برید وکړ، هغه یې ووهله او پرځمکه یې راوغورځوله بیایې پرې تېږي وار کړې او هر هغه کس چې د هغې مرستې ته وردانګل هغه یې هم وهلو.
هغه زیاته کړه چې مېشت شويو کسانو په عبراني ژبه چیغې وهلې «له دې ځایه ولاړ شئ.»
سوافته د رویټرز له امنیتي سلاکار “ګرېنټ باوډن” سره وه، چې هغه هم د هغې د ساتنې پر مهال ووهل شو. د هغې د کمرې وسایل مات کړل شول. دواړو خبریالانو خولۍ او د «پرس»نښې لرونکي جاکټونه اغوستي وو. امبولانس دواړه د نابلس ښار یو روغتون ته د درملنې لپاره یووړل.
په پېښه کې یو شمېر نور کسان هم ټپیان شوي دي.
رویټرز په یوه اعلامیه کې وویل: «موږ له اسراییلي چارواکو غوښتنه کوو چې دا پېښه وڅېړي او عاملین یې د قانون منګولو ته وسپاري او ډاډ ورکړي چې خبریالان کولې شي په ازاده توګه او له زیان پرته کار وکړي.»
د ملګرو ملتونو د جمعې د راپور له مخې، اسراییلي مېشت شويو کسانو یوازې د اکتوبر په میاشت کې لږ تر لږه ۲۶۴بریدونه د لویدیځې غاړې پر فلسطینیانو کړي، چې دا د ۲۰۰۶راهیسې د ملګرو ملتونو د ثبت له پیل راهیسې تر ټولو لوړه میاشتني شمېره ده.
