د امریکا ولسمشر ډونالد ټرمپ ویلي، په کانګرس کې جمهوري غوښتونکي د هغه هېوادونو پرضد چې له روسیې سره سوداګريزه راکړه ورکړه لري د نویو بندیزونو د طرحې په جوړولو بوخت دي او ښايي په ایران هم تازه بندیزونه ولګول شي.
ټرمپ د فلوریډا په پام بیچ ښار کې خبریالانو ته ویلي:«هر هغه هېواد چې د روسیې سره سوداګري کوي، خورا جدي بندیزونه به پرې ولګول شي.»
تر دې وړاندې د اکتوبر میاشتې په پیل کې د ټرمپ ادارې د مسکو پر وړاندې بندیزونه اعلان کړل؛ خو د امریکا د مالیې وزارت بیا پر لوکویل شرکت د بندیزونو د تطبیق نېټه چې د روانې نومبر میاشتې ۲۱مه نېټه ټاکل شوې وه وځنډوله؛ څو شرکت ته وخت ورکړل شي، چې خپله بهرنۍ شتمني وپلوري.
له بل پلوه د روان کال په پیل کې واشنګټن پر هند چې د روسیې د تېلو یو له لویو واردوونکو هېوادونو څخه دی، ۵۰ سلنه تعرفې ولګولې.
