د طالبانو د لوړو زدهکړو وزیر شیخ ندا محمد ندیم وایي، عصري علوم د «دونیوي ژوند» یوه لویه انساني اړتیا ده او تر څو چې دغه علوم ژوندي وي؛ نو د یوه هېواد پرمختګ شونی دی. هغه زیاتوي، په عصري علومو هېوادونه له برېښنا، د اوبو بندونو او غوره روغتیایي سیسټم څخه برخمن کېږي.
چهارشنبه د (لړم ۲۸مه) د طالبانو تر ادارې لاندې د افغانستان ملي راډیو ټلوېزیون په همدې تړاو د نوموړي یو غږیز کلېپ خپور کړی، چې پهکې زدهکړیالانو ته د عصري علومو پر ارزښت خبرې کوي. هغه وایي: «موږ او تاسو اقتصاد، کور، سوداګرۍ، روغتیا او د ژوند نورو ضرورتونو ته محتاج یو. دغه ټول عصري علومو پورې تړلې دي».
هغه ټینګار کوي، چې عصري علوم یوه انساني اړتیا ده او د همدې لپاره ښوونځي او پوهنتونونه د دغه علومو لپاره جوړ شوي دي. د طالبانو دغه وزیر همدا راز زدهکړیالانو ته زیاتوي، چې «باید له زدهکړو تر فراغت وروسته په قران کریم وپوهېږي او با دینه زدهکړیالان» د دوی تر ټولو لویه هیله ده.
ندا محمد ندیم داسې مهال پر عصري علومو ټینګار کوي، چې د دغې ډلې د امربالمعروف او د شکایتونو اورېدو وزیر خالد حنفي په وار، وار له عصري زدهکړو سره خپل مخالفت څرګند کړی. حنفي وایي، عصري علوم یو مباح عمل دی او ډېره پاملرنه ورته نهده په کار. طالبانو له دې سره، سره د نجونو پر زدهکړو هم سخت بندیزونه لګولي او له شپږم ټولګي پورته نجونې زدهکړې نهشي کولای.
که څه هم د طالبانو په منځ کې د عصري علومو او د نجونو زدهکړو په تړاو مخالف او موافق نظرونه شته؛ خو په ټوله کې دغه ډلې د دیني زدهکړو پراختیا لپاره په تېرو څه باندې څلورو کلونو کې ډېره پاملرنه کړې ده. یادې ډلې د پوهنتونو او ښوونځیو د پراختیا پر ځای زرګونه نوې مدرسې جوړې کړې او د پوهنتونو علمي کچې او چاپېریال یې برعکس ډېر زیانمن کړی دی.
د افغانستان انټرنشنل د موندنو له مخې؛ طالبانو د هېواد په بېلابېلو ولایتونو کې د پوهنتونو مسلکي او تخصصي استادان په بېلابېلو پلمو له دندو ګوښه کړي او پر ځای یې د خپل مذهبي فکر او ایډیالوژۍ اړوند ملایان ګومارلي دي.
