پاپ لیو د ټرمپ د کډوالۍ پر سیاستونو یو ځل بیا نیوکه وکړه
د نړۍ د کاتولیکانو مذهبي مشر پاپ لیو د کډوالو پروړاندې د امریکا د تاوتریخوالي پر ډک چلند نیوکه وکړه او ویې ویل، چې له کډوالو سره باید د «انساني چلند» لارې چارې ولټول شي.
د نړۍ د کاتولیکانو مذهبي مشر پاپ لیو د کډوالو پروړاندې د امریکا د تاوتریخوالي پر ډک چلند نیوکه وکړه او ویې ویل، چې له کډوالو سره باید د «انساني چلند» لارې چارې ولټول شي.
پاپ لیو نن چهارشنبه (د لړم ۲۸مه) په خپل استوګنځي کې خبریالانو ته وویل، چې که څوک په غېر قانوني توګه امریکا ته تللي وي، د هغوی لپاره قانوني لارې او قضایي میکانیزمونه موجود دي.
هغه زیاته کړه، له هغو کسانو سره چې کلونه یې په امریکا کې ژوند کړی، باید ناوړه او له درناوي پرته چلند ونشي.
نوموړي همدارنګه د امریکا د کاتولیک مشرانو وروستيو څرګندونو ته اشاره وکړه او له دوی سره یې ملاتړ څرګند کړ، کوم چې په یوه اعلامیه کې په کلیساګانو، ښوونځیو او روغتونونو کې د کډوالۍ اوږدمهاله محدودیتونو د لرې کولو غوښتنه کړې وه.
د یادونې ده، چې ټرمپ د خپلې دویمې دورې په لومړیو ورځو کې دغه محدودیتونه لرې کړي وو.
دا په داسې حال کې ده، چې پاپ لیو تر دې وړاندې هم د ټرمپ د کډوالۍ ضد سیاستونو پر وړاندې نیوکه کړې وه.
