د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې د چهارشنبې په ورځ له ایران او پاکستان نه ۱۷۶۳ کورنۍ چې ټولټال ۱۰۴۰۵ کډوال کېږي؛ افغانستان ته ستنې شوې دي.
د یاد کمېسیون د خبرپاڼې له مخې؛ له دې ډلې د سپین بولدک له لارې ۱۲۰۷ کورنۍ، د تورخم له لارې ۴۵۹ کورنۍ، د اسلامکلا له لارې ۳۳ کورنۍ او د ورېښمو پله له لارې۶۴ کورنۍ افغانستان ته ستنې شوې دي.
د پنجاب پولیسو خبر ورکړی، چې د راولپنډۍ په بېلابېلو سیمو کې د بېاسناده افغان کډوالو پر ضد د پلټنې عملیات دوام لري. د دوی لهخوا په خپرې شوې خبرپاڼه کې راغلي، چې د دغه عملیاتو په لړ کې ۳۸ بېاسناده افغان کډوال نیول شوي دي.
د خبرپاڼې له مخې؛ دغه عملیات په پیرودهای، ګنجمنډي، وارث خان، باني، نیو ټاون، صادق اباد، رته امرال، صدروا، نصیر اباد، کېنټ، مورګاه، راوت، چونترا، جاټلي، ماندارا، ګوجر خان، دمیال او نورو سیمو کې ترسره شوي دي. د پلټنې یاد عملیات په ۱۲۷۱ کورونو، ۶۴۲ هټیو او ۶۳ هوټلونو کې شوي دي.
خبرپاڼه زیاتوي، چې د کور په کور پلټنو پرمهال یې بېاسناده افغان کډوالو ته په کرایه د کور ورکولو په تور هم ځینې قضیې ثبت کړې دي.
د پنجاب پولیسو تېره ورځ هم د یو لړ عملیاتو پرمهال د ۴۳ بېاسناده افغان کډوالو د نیول کېدو خبر ورکړی و.
په کابل کې د ایران سفیر عليرضا بېکدلي ویلي، هېواد یې ژمن دی چې د چابهار بندر له لارې د افغانستان وچې مېوې نړۍوالو بازارونو ته ورسوي. تازه د چابهار بندر له لارې د افغانستان د وچې مېوې د صادراتو ټولنې او ایراني شرکت ترمنځ د ۹۰ میلیونه ډالرو په ارزښت یو تړون هم لاسلیک شو.
په کابل کې د ایران سفیر عليرضا بېکدلي د چهارشنبې په ورځ (د لړم ۲۸مه) ویلي، د ایران چابهار بندر د افغانستان د صادراتو لپاره اسانه لار ده.
د طالبانو تر واک لاندې ملي ټلوېزیون د نوموړي له قوله ویلي: «ایران ژمن دی، چې د چابهار بندر له لارې د افغانستان وچې مېوې تر نړۍوالو مارکېټونو ورسوي.»
بېکدلي د ایراني او افغان شرکتونو ترمنځ د ۹۰ میلیونه ډالرو په ارزښت تازه تړون هم یو مهم اقدام یاد کړی.
په همدې ورځ د ایران د چابهار بندر له لارې د افغانستان د وچې مېوې د صادراتو اړوند د افغانستان د وچې مېوې د صادراتو ټولنې او یوه ایراني شرکت ترمنځ د ۹۰ میلیونه ډالرو په ارزښت یو تړون لاسلیک شو.
د همدې تړون له مخې به د افغانستان د وچې مېوې ۳۰ زره کانټینرونه د هند او چین مارکېټونو ته صادر شي.
د تړون تر لاسلیک وروسته دواړو ټولنو دا اقدام د کابل او تهران د سوداګریزو اړیکو د پراختیا او د چابهار بندر له لارې د افغانستان د وچو مېوو د صادراتو لپاره ښه فرصت ګڼلی.
د طالبانو او پاکستان ترمنځ تر وروستۍ ترینګلتیا وروسته طالب مشرانو له افغان سوداګرو غوښتي، چې له پاکستان سره سوداګریزې اړیکې بندې او دوی ورته بدیلي لارې ولټوي.
نن د طالبانو د صنعت او سوداګرۍ وزیر نورالدین عزیزي نوي ډیلي ته رسېدلی او ویل کېږي، چې عزیزي به په دغه پنځه ورځني سفر کې له هندي چارواکو سره پر دوه اړخیزې سوداګرۍ او هوايي دهلېز خبرې وکړي.
طالبانو په کاپیسا، پکتیا او پروان ولایتونو کې د دوو ښځو په ګډون پنځه کسان د «غلا، اخلاقي فساد او نامشروع اړیکو» په تور په عام محضر کې په دُرو وهلي دي. طالبانو دغو کسانو ته له یوه تر دوو کلونو پورې د تنفيذي بند سزا هم ورکړې ده.
د طالبانو سترې محکمې د چهارشنبې په ورځ (د لړم ۲۸مه) په بېلابېلو خبرپاڼو کې اعلان کړی، چې له یاد شمېر کسانو څخه یې په کاپیسا ولایت کې یو کس د «غلا» په تور په ۳۹ دُرو وهلو او دوه کلن بند محکوم کړی دی.
دغې ادارې ویلي، چې په پکتیا کې یې یوې ښځې ته د «اخلاقي فساد» په تور د یو کال بند او ۳۹ دُرو سزا ورکړې ده.
د طالبانو د سترې محکمې د معلوماتو له مخې، په همدې ورځ یې په پروان ولایت کې یوې ښځې او دوو نارینهوو ته د «نامشروع اړیکو» په تور هر یوه ته ۱۸ میاشتې بند او ۳۹ دُرو سزا ورکړې ده.
دا په داسې حال کې ده، چې طالبانو پر افغانستان له واکمنېدو وروسته د هېواد په بېلابېلو سیمو کې سلګونه کسان د بېلابېلو تورونو له امله په عام محضر کې په دُرو وهلي دي او په دې وروستیو کې بیا د طالبانو له لوري خلکو ته د بدنې سزاوو پېښې هم زياتې شوې دي.
دغې ډلې تېره ورځ هم په ننګرهار او بلخ ولایتونو کې د یوې ښځې په ګډون ۳ کسان د بېلابېلو تورونو په تړاو په عام محضر کې په دُرو وهلي دي.
د امریکا ولسمشر ډونالډ ټرمپ وایي، باور لري چې د سعودي ولیعهد محمد بن سلمان به د غزې د بیارغونې د څارنې لپاره د سولې له کمېسیون سره یوځای شي.
د امریکا ولسمشر د سې شنبه په شپه (د لړم ۲۷مه) هیله څرګنده کړې وه، چې محمد بن سلمان به د نړۍ له ګڼ شمېر مشرانو سره یو ځای په دې نوي اقدام کې ګډون وکړي.
د ملګرو ملتونو د امنیت شورا څو ورځې مخکې د امریکا په ملاتړ یو پرېکړه لیک تصویب کړ، چې دې پلاوي ته له جګړې وروسته د غزې د دوو کلونو د مدیریت پراخ صلاحیت ورکوي.
محمد بن سلمان لا تر اوسه په دې هییت کې د ګډون پرېکړه نه ده تایید کړې. دا کمېسیون لا هم په بشپړ ډول نه دی جوړ شوی؛ خو د ډونالډ ټرمپ له خوا رهبري کېږي.
په کندهار کې د طالبانو د غصب د مخنیوي کمېسیون غړي وايي، یو شمېر غاصبین او زورواکي هڅه کوي، چې د دوی د کارونو پر وړاندې ستونزې جوړې کړي او فشار زیات کړي. د دغه کمېسیون غړي وايي، چې یوازې د هبتالله فرمان عملي کوي او د هېڅ فشار پروا نه لري.
د یاد کمېسیون غړو دغه څرګندونې په داسې حال کې کړي، چې په کندهار کې طالبانو د چهارشنبې په ورځ (د لړم ۲۸مه) ویلي، چې په دامان ولسوالۍ کې یې ۱۹ زره او ۵۰۰ جریبه امارتي ځکمه له غصب څخه خلاصه کړې.
له غصب څخه د مخنیوي پلاوي غړي عبدالمتین سعید ویلي، خلاصه شوې ځمکه باید د هبتالله له لوري د ملي ګټو او عامه خدمتونو لپاره وکارول شي.
د نوموړي په خبره، د غصب شویو ځمکو د خلاصولو لړۍ پیل شوې او د کندهار په صنعتي پارک کې به هم غصب شوې ځمکه ژر خلاصه کړي.
د سعید په خبره، یو شمېر زورواکي او غاصبین هڅه کوي تاثیرات او فشارونه زیات کړي، خو دوی یې پروا نه ساتي.
هغه زیاته کړې: «غاصبین او زورواکي هڅه کوي چې فشارونه او اغېزې واچوي، خو موږ دا په پام کې نه نیسو. د خپل مشر د فرمانونو مطابق کار ته دوام ورکوو او د غصب مخنیوی کوو.»
دغه کمېسیون ویلي، چې په تېرو درېیو میاشتو کې یې په دامان ولسوالۍ کې ۱۸ زره جریبه نوره ځمکه هم له غصب څخه خلاصه کړې وه.
دا په داسې حال کې ده، چې د طالبانو د عدلیې وزارت تر دې وړاندې ویلي و چې تراوسه د هېواد په کچه له غاصبینو شاوخوا څلور مېلیونه جریبه دولتي ځمکه بېرته اخیستل شوې او د نورو زرګونو جریبو ځمکو د بېرته راګرځولو قضیې لا هم تر څېړنې او تعقیب لاندې دي.
دغه وزارت په وار-وار ټينګار کړی، چې د ځمکو د بېرته ترلاسه کولو بهیر د روڼتیا او د دوی د قانون پر بنسټ روان دی او د ملکیتونو د تثبیت دا هڅې به د عامه شتمنیو د ساتنې او د دغه ډلې د قانون حاکمیت د پیاوړتیا لامل وګرځي.