پخواني ولسمشر محمداشرف غني نن پنجشنبه د (لړم ۲۸مه) پر اېکس پاڼه یو پیغام خپور کړی، چې پهکې یې د افغانستان پر اوسني وضعیت، د سولې په اړتیا، د ملي ګټو د تعریف او د راتلونکي په اړه خپل لید لوری وړاندې کړی دی.
اشرف غني ویلي، افغانستان د تاریخ په یو ډېر حساس پړاو او د مهمو انتخابونو پر دوهلارې ولاړ دی. د هغه په وینا؛ په دغه انتخابونو کې د جدي ګواښونو تر څنک د بدلون فرصتونه هم شته. هغه ویلي، افغانان د دې تمه لري چې ملي ګټې یې روښانه شي او د خوندي کولو لپاره یې څه ډول عمومي تفاهم ته اړتیا ده.غني لیکلي، چې د خلکو اصلي پوښتنه دا ده چې د دغه وضعیت غوښتنې څه دي او د حل لپاره یې څه باید وشي؟ د ده په باور؛ د اوسني وضعیت د تعریف، د راتلونکي احتمالي لوري، د ملي ګټو د ټاکلو او د هغوی د ټینګښت د لارو پر سر روښانه بحث ته اړتیا ده.هغه ټینګار کړی، چې تلپاتې سوله د افغانستان د مشروع حاکمیت، ثبات، اقتصادي ودې، ولسي سوکالۍ او نړۍوال اعتبار بنسټ جوړوي. غني زیاتوي، افغانان نږدې پنځه لسیزې له دغه حقونو بېبرخې پاتې شوي او د سولې مساله باید د ملي بحث له اجنډا ونه غورځول شي.پخواني جلاوطنه ولسمشر په خپل پیغام کې ټینګار کړی، چې د سولې ترلاسه کول یوازې د یوې ډلې د ارادې په تحمیل نه کېږي؛ بلکې ټول افغانان باید په ګډه د سولې، ثبات او راتلونکي لپاره کار وکړي.پخواني ولسمشر د شل کلنو تېرو تجربو یادونه کړې او ویلي یې دي، چې په تېر نظام کې د فساد، رشوت، زورواکۍ، انډیوالیزم، قومي او سیمهییز تعصب او د عدالت نشتوالي ستونزې وې او دا خلک دي چې باید پرېکړه وکړي اوسنی وضعیت د هغو نیمګړتیاوو د جبران لوري ته روان دی که نه.په پیغام کې د هېواد امنیتي او انساني وضعیت ته په اشارې سره غني لیکلي، چې د دوه نیم مېلیونه افغان کډوالو جبري اېستل، ویجاړوونکې زلزلې، طبیعي پېښې او تر ټولو مهم د پاکستان پوځي تېری او د هغه پایلې، د افغانستان وضعیت تر پخوا ډېر خراب کړی دی. د هغه په خبره؛ دغه حالت بېړنیو او جدي اقداماتو ته اړتیا لري.محمد اشرف غني ویلي، افغانستان د دوو لارو پر سر ولاړ دی؛ یوه لاره د اوسني ناورین د رغولو او ستونزو حل ته رسېږي او بله لاره د بحران د ژورېدو او ناڅرګندو پایلو لوري ته چې ښایي په راتلونکو دوو کلونو کې څرګندې شي. د هغه په باور؛ ملي بحث باید پر دې متمرکز شي چې څنګه اهداف وټاکل شي، څنګه هېواد له نړۍ سره بېرته ونښلول شي او څنګه نړۍوالې او سیمهییزې اړیکې بېرته ورغول شي.هغه ټینګار کړی، چې د افغانستان راتلونکی په یووالي، یوه ملي اجماع، د مشروعیت په ټینګښت او په داسې روزل شوي ځوان نسل ولاړ دی چې وکولای شي له نړۍ سره سیالي وکړي.غني په پای کې ټینګار کړی، چې شخصي غوښتنې نهلري؛ خو که اړتیا او د خلکو غوښتنه وي، دی چمتو دی د روان ناورین د حل او د رغوونکو لارو په وړاندې کولو کې خپله ونډه ترسره کړي.
