د خیبر پښتونخوا پولیس وايي چې د پنجشنبې په ورځ د دیره اسماعیل په کلاچي سیمه کې د پولیسو پر موټر بمي چاودنه شوې، چې له امله یې دوه پولیس وژل شوي او څلور نور ټپیان دي. د خیبر پښتونخوا اعلی وزیر دا برید غندلی دی.
د پولیسو د سرچینو په وینا، د پولیسو یو زغره وال ګاډی په هتاله سیمه کې د سړک غاړې ماین ښکار شوی، چې له امله یې دوه پولیس سرتېري ځای پر ځای ووژل شول.
د ولسوالۍ د پولیسو مشر ویلي، سیمې ته امنیتي ځواکونه رسېدلي، ساحه یې کلابنده کړې او د بریدګرو د موندلو لپاره یې لټون پیل کړی.
سیمه ییز چارواکي زیاتوي چې د چاودنې دقیق ماهیت تر څېړنو لاندې دی.
د پاکستان د کورنیو چارو وزیر محسن نقوي د پېښې پخلی کړی او ویلي یې دي چې دوه پولیس، سیف الرحمن او رمضان په دغه برید کې وژل شوي او څلور نور ټپیان دي.
د خیبر پښتونخوا اعلی وزیر برید غندلی او ویلي یې دي چې «دا ډول بزدلانه بریدونه د دوی حوصله او اراده نه شي کمزوري کولی». هغه ټینګار کړی چې د ترهګرۍ پر ضد جګړه به په لا قوي هوډ سره روانه وي.
