د خراسان ډایري په نوم له اسلام اباد نه خپرېدونکې یوې رسنۍ ویلي، چې نن جمعه (د لړم ۳۰مه) سهار وختي د خېبر پښتونخوا په بنو ولسوالۍ کې د «ټيټيپي» وسلهوالې اړوند یوې ډلې د پاکستان امن ځواک پر دفتر برید کړی. راپور وایي، تر اوسه ۷کسان وژل شوي او یو کس ټپي دی.
د راپور له مخې؛ برید کوونکې ډله د حافظ ګل بهادر په مشرۍ د اتحاد المجاهدین پورې تړلې ده. لا تر اوسه د برید په تړاو نور جزییات نهدي ورکړل شوي او دا هم نه دي ویل شوي، چې وژل شوي کسان څوک دي.
د خیبر پښتونخوا په کورمې، مومند او لکي مروت ولسوالیو کې د پاکستاني ځواکونو په جلا، جلا عملیاتو کې ۳۰وسلهوال وژل شوي دي. د پاکستان پوځ د عامه اړیکو څانګې خبر ورکړی، چې دغه عملیات د استخباراتي معلوماتو پربنسټ شوي دي.
د یادې ادارې د خبرپاڼې له مخې؛ یوازې په کورمې ولسوالۍ کې د دوو جلا عملیاتو پرمهال ۲۳وسلهوال وژل شوي دي. په خبرپاڼه کې راغلي، چې ۴ وسلهوال په مومند او ۲ نور په لکي مروت ولسوالیو کې وژل شوي دي.
په خبرپاڼه کې د پاکستان امنیتي ځواکونو ته د اوښتې مرګ ژوبلې په اړه څه نهدي ویل شوي.
د دغه عملیاتو په تړاو د پاکستان لومړي وزیر شهباز شریف بیا ویلي، چې جګړه به تر هغې دوام وکړي؛ څو چې له دغه هېواده د ترهګرۍ ګواښ په بشپړه توګه لهمنځه نهوي وړل شوی.
د پښتون ژغورنې غورځنګ مشر منظور احمد پښتین وایي، د بنو عدالت نن د ګیلهمن وزیر ورور عرفات او د هغه د تره زوی حاضرخان بنديان کړي دي.نوموړي زیاته کړې، د پاکستان عدالت او پولیس د دې پر ځای چې د ګیلهمن کورنۍ ته انصاف ورکړي، برعکس یې شکنجه کوي او ځوروي.
منظور احمد پښتین د چهارشنبې په ورځ (د لړم ۲۸مه) پر خپلې فېسبوک پاڼې لیکلي: «پوځ له پښتنو سره په دوښمنۍ بوخت دی؛ پښتانه وژني، عدالت او پولیس پښتانه بندیانوي، ادارې یې لادرکه کوي، رسنۍ د پښتنو د ذهني او سیاسي ګډوډۍ لپاره پروپاګند خپروي، تعلیمي ادارې د پنجاب تر اغېز لاندې دي او پارلمان د دې ټولو انساني او اخلاقي ضد کړنو د جواز لپاره بیلونه پاسوي.»
نوموړی دغه څرګندونې په داسې حال کې کوي، چې د ګیلهمن د ورور او د هغه د تره د زوی د بندي کېدو لامل تراوسه روښانه نه دی.
ګیلهمن وزیر د پاکستان پر پوځ د سختو نیوکو او له افغانستان سره د مینې او د افغان ملي بیرغ د ګرځولو او له هغه د جوړو جامو د اغوستلو له امله افغانانو کې ډېر محبوبیت درلود.
د پښتون ژغورنې غورځنګ غړی ګیلهمن وزیر د ۲۰۲۴ کال د جولای په اوومه نېټه په اسلام اباد کې د پاکستان تحریک انصاف ګوند د غړي له خوا پر سر ووهل شو او درې ورځې وروسته په روغتون کې مړ شو.
د پښتون ژغورنې غورځنګ مشر منظور احمد پښتین وایي، پاکستاني پوځ په تېراه نرهاو سیمه کې د یوه پښتون پر کور هاوان ویشتی، چې له امله یې یو کس له خپل اووه کلن زوی سره وژل شوی دی.
پښتین همداراز زیاته کړې، چې د پاکستان اداره هڅه کوي د پښتنو د غم او درد ویونکو ته ستونزې جوړې کړي.
نوموړي یو ځل بیا ګواښ کړی، چې د هر ډول ظلم پر وړاندې به چوپ او ټیټ پاتې نه شي.
هغه زیاته کړې: «بیا به هم د دوی د هر ډول چلند پر ضد زموږ مزاحمت روان وي. نه به ټیټ شو، نه به له خپل ملي دریځه پر شا شو، بلکې د تیارۍ له مخې به لا نور هم پیاوړي کېږو، څو خپله خاوره له بلواکۍ او زورواکۍ څخه خپلواکه کړو.»
د پاکستان د پوځ د عامه اړیکو دفتر وايي، چې ددغه هېواد امنیتي ځواکونو په خیبر پښتونخوا کې په دوو جلا عملیاتو کې ۱۵ جنګیالي وژلي دي. دغه عملیات د دېره اسماعیل خان په کلاچي او د شمالي وزیرستان په دته خېل سیمو کې شوي. پاکستاني طالبانو تر اوسه په دې اړه څه نه دي ویلي.
د پاکستان د پوځ عامه اړیکو دفتر نن سې شنبه ورځ، د لړم ۲۷مه د یوې خبرپاڼې په خپرولو سره ویلي، چې یاد عملیات په تېرو دوو ورځو کې شوي دي.
دوی زیاتوي، چې د بنو کلاچي سیمه کې د عملیاتو پرمهال لس تنه او د شمالي وزیرستان په دته خېل سیمه کې د عملیاتو پرمهال ۵ ته وسله وال وژل شوي دی.
په خبرپاڼه کې راغلي، چې دغه عملیات د استخباراتي معلوماتو پر بنسټ شوي دي.
د پاکستان پوځ په اعلامیه کې د وژل شو وسله والو د هویت په اړه څه نه دي ویلي او نه هم پاکستاني طالبانو او نورو مخالفو وسله والو ډلو په دې اړه تراوسه څه ویلي دي.
د پښتونخوا ملي عوامي پارټۍ مشر محمودخان اڅکزی وايي، چې که نړیوال ټي ټي پي او بلوڅانو ته ټانک او هلیکوپټر ضد وسلې ورکړي، څوک به له کورونو ونه وتلای شي. اڅکزی وايي، بلوڅ دي، که پښتون او ټي ټي پي، دا ټول پاکستان جوړ کړي وو او باید خبرې ورسره وشي.
د پښتونخوا ملي عوامي پارټۍ مشر محمودخان اڅکزي پر خپل اېکس لیکلي، چې که بلوڅ [جنګیالي] دي او که پښتانه [جنګیالي] او ټي ټي پي، دا ټول پاکستان جوړ کړي وو او له دوی سره باید خبرې اترې وشي.
اڅکزی وايي، « وویریږئ چې که د نړۍ هېوادونو دغو خلکو ته د ټانک ضد او د چورلکو ضد وسلې ور کړې، نو تاسې به له کورونو هم ونه وتلای شئ».
اڅکزی وايي، دا سیمه له خطر سره مخ ده، ځکه دده په وینا، په دې سیمه کې شتمنۍ شته او د دې شتمنیو د ترلاسه کولو لپاره د نړۍ ستر ځواکونه غواړي «موږ په جګړه کې سره ښکېل کړي، لکه څنګه چې یې په افریقا کې وکړل».
نوموړی وايي، « د افریقا خلک د لوږې له امله مړه کېدل، خو هغوی یې لوټول».
پاکستانۍ ډان ورځپاڼې راپور ورکړی، چې د دغه هېواد ځواکونو د یو لړ استخباراتي معلوماتو پر بنسټ د خېبر پښتونخوا په تېراه دره کې د «ټيټيپي» ۵ غړي وژلي دي. دغه عملیات د یکشنبې په ورځ د (لړم ۲۵مه) د یادې درې په میريخېلو سیمه کې شوي دي.
راپور کې راغلي، چې وژل شويو کسانو د پاکستاني طالبانو غورځنګ د یوه سیمهییز قوماندان ابو ذر په مشرۍ فعالیتونه کول او دوه تنه پهکې افغانان دي. راپور زیاتوي، د ټيټيپي دغه وژل شوي افغان جنګیالي «احسان بدري، صبایب لیزري» نومېږي. همدا راز زیاته شوې، چې د دغه دواړو وسلهوالو مړي ننګرهار ته لېږدول شوي او د جنازو مراسم یې هلته ترسره شوي دي.
یاد عملیات داسې مهال کېږي، چې اسلاماباد پر کابل واکمن طالبان تورنوي چې د «ټيټيپي» جنګیالیو ته یې خپله خاور کې ځای ورکړی او له هماغه ځایه په پاکستان کې بریدونه تنظیموي. افغان طالبان بیا دغه ادعاوې ردوي او پاکستان کې روانه نا امنۍ د یاد هېواد داخلي کمزوري بولي.
د «ټيټيپي» پر سر د افغان طالبانو او پاکستان ترمنځ اړیکې هم سختې کړکېچنې شوې او پر یو بل یې ډیورنډ کرښه کې دروازې هم د هر ډول سوداګرۍ او تګ راتګ پرمخ تړلې دي. دواړه لوریو څو اونۍ وړاندې په قطر او ترکیې کې تر جګړو وروسته اوربند هم وکړ؛ خو د مسایلو په تړاو یې ترمنځ درې پړاوه مذاکرات په پرلهپسې توګه ناکام شول.
دواړه لوریو یو بل تورن کړي، چې د مسایلو حل ته غاړه نه ږدي او د خبرو په ګډوډیو یې یو بل تورن کړي دي.