څلورو امریکایي چارواکو رویټرز خبري اژانس ته ویلي، چې متحده ایالات په راتلونکو ورځو کې په ونزویلا کې د عملیاتو د نوي پړاو د پیل لپاره چمتووالی نیسي. دوو نورو چارواکو بیا ټینګار کړی، چې د ارزونې له مخې د نیکولاس مادورو د حکومت د ړنګولو هڅه هم شامله ده.
رویټرز راپور ورکړی، چې د عملیاتو دقیق وخت یا د هغې حدود لا مشخص نه دي او روښانه نه ده، چې ایا ټرمپ د دې عملیاتو د ترسره کولو وروستۍ پرېکړه کړې ده او که نه.
دا په داسې حال کې ده، چې په وروستیو اوونیو کې د کاراییب سیمه کې د امریکایي ځواکونو د ځای پر ځای کېدو او د واشنګټن او کاراکاس ترمنځ د اړیکو د خرابېدو له امله، ګڼ شمېر راپورونه د احتمالي نویو پوځي یا امنیتي اقداماتو په اړه خپاره شوي دي. دوو امریکایي چارواکو ویلي، چې احتمالي پټ عملیات ښايي د دې بهیر لومړی ګام وي.
د ټرمپ حکومت د هغو ګزینو ارزونه کوي، چې د مادورو په رول د غېرقانوني نشه یي توکو په برابرولو د مقابلې لپاره کارېدلی شي؛ هغه رول چې امریکایي چارواکي وايي چې د امریکايي وګړو ژوند یې اخیستی دی.
مادورو چې له ۲۰۱۳ کال راهیسې په واک کې دی، ویلي دي چې د ټرمپ حکومت د هغه د لرې کولو په لټه کې دی او اعلان یې کړی، چې د ونزویلا خلک او پوځ به د دې ډول هر اقدام پروړاندې مقاومت وکړي.
