په غور کې د عامې روغتیا کارکوونکو د دغې ادارې له رییس څخه شکایت کړی
د افغانستان انټرنشنل له خوا ترلاسه شوي اسناد ښیي، چې د غور ولایت د عامې روغتیا رییس د ملکي خدمتونو کار کوونکي پرته له کوم وضاحت څخه له دندو ګوښه او بدلوي.
د افغانستان انټرنشنل له خوا ترلاسه شوي اسناد ښیي، چې د غور ولایت د عامې روغتیا رییس د ملکي خدمتونو کار کوونکي پرته له کوم وضاحت څخه له دندو ګوښه او بدلوي.
دغو معترضو کار کوونکو د عبدالواحد حماس دغه کړنه خپل سرې بللې او ویلي یې دي، چې هغه د ملکي خدمتونو یو کار کوونکی له دندې ګوښه او خپل ورور یې د هغه پر ځای ګومارلی دی.
د غور د عامې روغتیا رییس د کار کوونکو د تبدیلۍ او اعتراض په هکله رسنیو ته څه وضاحت نه دی ورکړی.
په دغو اسنادو کې لیدل کېږي، چې بېلابېلو مسوولینو د غور ولایت د عامې روغتیا له رییس عبدالواحد حماس څخه د شکایتونو، اداري چارو، د کارکوونکو تبدیلۍ او د هغوی د دندو د اجرا په تړاو د وضاحت غوښتنه کړې ده.
د یو سند له مخې، یو کس له خپلې دندې د ګوښه کېدو په اړه د غور ولایت د عامې روغتیا رییس ته شکایت کړی دی او له هغه یې پوښتي چې د دغې پرېکړې علت څه دی.
د دغو اسنادونو له مخې، ښاغلي حماس یو بل کس د عبداللطیف په نوم د ګوښه شوي کار کوونکي پر ځای ګومارلی چې ویل کېږي د عامې روغتیا د رییس ورور دی.
شکایت کوونکي کس خبرداری ورکړی، چې که ځواب تر لاسه نه کړي، لوړپوړو چارواکو ته به شکایت وکړي.
په بل سند کې، یوه کار کوونکي د خپل بست د بدلېدو، نویو ګومارنو او د اداري چلند څخه شکایت کړی دی.
په نورو جلا سندونو کې چې افغانستان انټرنشنل ترلاسه کړي، د غور ولایت د عامې روغتیا په برخه کې د ډېرو نورو ادارو مسلو ته هم اشاره شوې ده.
دغه اسناد ښيي چې یو له اصلي شکایتونو د غور ولایت د عامې روغتیا د مشر له خوا د غېر اړونده پوستونو لپاره د نورو اشخاصو ګومارنه او بدلون دی.
تر دې وړاندې هم سرچینو افغانستان انټرنشنل ته ویلي وو، چې په دغه ولایت کې د روغتون څو کارکوونکي د طالبانو د عامې روغتیا د مشر عبدالواحد حماس په امر له دندې ګوښه شوي دي او یو شمیر ډاکټران د رییس له خوا د فشار له امله استعفا ته اړ شوي دي.
افغانستان انټرنشنل د غور د عامې روغتیا له مشر سره اړیکه ونیوله تر څو په دې تړاو پوښتنو ته ځواب ووایي، خو هغه زموږ پوښتنو ته له ځواب ورکولو ډډه وکړه.
