متحده عربي اماراتو د شنبې په ورځ اعلان وکړ، چې د یو میلیارد ډالرو په ارزښت به پانګونه وکړي، څو په ټوله افریقا کې د مصنوعي ځیرکتیا زېربناوې او د AI پر بنسټ خدمات پراخ کړي. موخه یې دا ده، چې له افریقایي هېوادونو سره د ملي پرمختیایي اهدافو په ترلاسه کولو کې مرسته وکړي.
د اماراتو د دولت وزیر سعید بن مبارک الحاجري د «پرمختګ لپاره اې ای نوښت» د جي-۲۰ د مشرانو په سرمشریزه کې چې په جوهانسبرګ کې روانه ده، اعلان کړ. هغه وویل، چې دا نوښت به د زده کړو، روغتيا او د اقلیم د بدلون د مقابلې په برخو کې د اې ای ټېکنالوژي رامنځته کړي.
هغه زیاته کړه: «موږ اې ای یوازې د راتلونکي صنعت په توګه نه، بلکې د بشریت د راتلونکي د بنسټ ډبرې په توګه ګڼو.»
هغه وویل: «له همدې امله زما هېواد د نوښت د ګړندي کولو لپاره فعال ګامونه اخلي، تر څو د تولید وړتیا لوړه کړي او په نړۍوال اقتصاد کې د پام وړ پرمختګونه رامنځته کړي.»
