ملګري ملتونه وايي، د ماشومانو د ملاتړ صندوق (یونېسف) او د واکسین د نړۍوالې ادارې (ګاوي) ترمنځ د دوشنبې په ورځ (د لیندۍ ۳مه) د یوه هوکړه لیک په لاسلیک کېدو سره د ملاریا واکسین بیه راټیټه شوه. د دې هوکړې لهمخې به د واکسین بیه په یوه کال کې له څلورو ډالرو ۲،۹۹ ډالرو ته راښکته شي.
ملګري ملتونه وايي، د دغې هوکړې پر بنسټ به تر ۲۰۳۰ کال پورې څه باندې ۷ میلیونه ماشومان د ملاریا له واکسین څخه برخمن شي او همداراز به د دغې ادارې په بودیجه کې شاوخوا ۹۰ میلیونه ډالره سپما هم وشي.
ملاریا لا هم د نړۍ له خطرناکو ساري ناروغیو څخه ده. یوازې په ۲۰۲۳ کال کې د دغې ناروغۍ له امله شاوخوا ۵۹۷ زره کسان مړه شوي او د مړینې ډېرې پېښې هم په افریقايي هېوادونو کې رامنځته شوې دي.
تر دې مخکې، د ګاوي په ملاتړ د پروګرامونو له لارې ۴۰ میلیونه ډوزه واکسین ویشل شوي او همداراز ۲۴ افریقايي هېوادونو ملاریا واکسین د عادي واکسیناسیون یوه برخه ګرځولې ده.
سره له دې چې د ملاریا د ناروغۍ کچه په افریقايي هېوادونو کې لوړه ده، خو د روغتیا نړۍوال سازمان د اګسټ میاشتې په راپور کې ویلي و، چې په افغانستان کې هم د ملاریا ناروغۍ په پېښو کې د پام وړ زیاتوالی راغلی دی.
