د امريکا او اوکراين چارواکو د دوشنبې په ورځ هڅه وکړه چې د جګړې ختمولو پر پلان د دواړو لوریو تر منځ موجود اختلافات راکم کړي. واشنګټن او کییف په یوه ګډه اعلامیه کې وویل چې دوی د یکشنبې د ورځي د جنیوا له مذاکراتو وروسته د سولې پلان یوه ایډیټ شوې مسوده نهايي کړې ده.
که څه هم د خبرو جزئیات نه دي افشا شوي، خو دغو خبرو ته د اوکراین ځینو متحدینو په احتیاط هرکلی ویلی.
ولسمشر ولادیمیر زیلینسکي وویل چې اوکرایني پلاوی به د دوشنبې په ورځ بېرته هېواد ته ستانه شي.
امریکا تېره اونۍ په ناڅاپي ډول کییف او اروپايي هېوادونه د خپلې ۲۸ مادیزې سولې طرحې سره مخ کړل او اوکراین ته یې د پنجشنبې تر ورځې وخته ورکړ چې د جګړې د ختمېدو لپاره چوکاټ ومني.
د دې طرحې له مخې به اوکراین اړ وځي چې نوره خاوره هم له لاسه ور کړي، خپل پوځ محدود کړي او هېڅکله د ناټو د غړیتوب هڅه ونه کړي، خو اوکراین دا د تسلیمۍ په معنا بللي.
مسکو، چې د امریکا لومړنۍ طرحه یې د سولې د احتمالي بنسټ په توګه ستایلې وه، د اروپا طرحه رد کړې.
