د پاکستان د ملي افتونو ادارې NDMA د پېښور عالي محکمې ته په خپل تازه راپور کې ویلي، چې د ۲۰۲۵کال د سختو موسمي سېلابونو له امله په خېبرپښتونخوا کې ۵۰۴ کسان مړه شوي دي. د مړو شویو له ډلې ۳۳۸ نارینه، ۷۶ ښځې او ۹۰ تنه ماشومان دي.
راپور د هغې غوښتنې په ځواب کې محکمې ته وړاندې شوی، چې پهکې د سږنیو طبيعي پېښو له امله د خلکو د تاوان د جبران او د یوه هر اړخیز ناورین مدیریت پلان د جوړېدو غوښتنه شوې وه.
یادې ادارې ویلي، چې د پاکستان لومړي وزیر د هر مړه شوي کس کورنۍ ته د دوه مېلیونه کلدارو مرستې منظور کړې دي. د خېبرپښتونخوا د بېړنیو مرستو او بیارغونې ادارې او د اقلیم بدلون وزارت هم خپل ځوابونه محکمې ته سپارلي دي.
په غوښتنلیک کې له محکمې غوښتنه شوې، چې حکومت دې د ورته غمیزو د بیا تکرار د مخنیوي لپاره عملي ګامونه واخلي. د ځنګلونو پراخېدنه، د مناسبې بنسټیزې زېربنا جوړول، د چټکې خبرتیا سیسټم رامنځته کول، د بېړنیو حالاتو لپاره چمتووالی، د طبیعي پېښو د تاوان ارزونه، د زیانمنو سیمو بیا رغول او د لومړنیو اړتیاوو لکه خوړو، سرپناه او درملنې برابرول په دغه پلان کې شامل دي. دغه شان د اقلیمبدلون د اغېزو د مهار غوښتنې هم پهکې شاملې شوې دي.
د پاکستان د ملي افتونو ادارې په وینا؛ تر ټولو ډېر تلفات په بونیر کې ثبت شوي، ورپسې په صوابۍ، سوات، شانګله، مانسهره او باجوړ کې دي. په دغه سېلابونو کې ټول ټال ۲۱۸ کسان ټپيان شوي هم دي.
راپور زیاتوي، چې ټولټال ۳٬۲۲۲ کورونه زیانمن شوي چې له ډلې یې ۷۰۱ کورونه په بشپړه توګه ویجاړ شوي دي. د کورونو تر ټولو زیات زیان هم په بونیر کې رامنځته شوی دی. تر دې سربېره، له ۵٬۴۶۰ ډېر څاروي هم لهمنځه تللي دي.
یادې پاکستانۍ ادارې ویلي، چې د دوی د خبرداریو څانګه د سپوږمکۍ معلوماتو او د ځمکمنۍ ارزونې پر بنسټ د څار شبکو له لارې د هوا او اوبو وضعیت په دوامداره توګه څاري. یادې ادارې ټینګار کړی، چې د «۲۰۲۵ ملي بحران مدیریت پلان» په هېواد کې د طبیعي ګواښونو هراړخیز انځور وړاندې کړی دی.
د خیبرپښتونخوا د بېړنیو مرستو اداره وايي، چې د ژغورنې ۱۱۲۲ ټیمونو تر اوسه له ۶٬۳۹۵ ډېر کسان له سېلابځپلو سیمو ژغورلي او ۴۴۲ مړي یې موندلي دي. دغه اداره وايي، چې سخت بارانونه، ناڅاپي سېلابونه او ځمک ښویېدنې طبیعي او د نه اټکل وړ پېښې دي. د راپور له مخې؛ د بارانونو له پیل مخکې د لوړپوړو چارواکو په ګډون د چمتووالي ناسته ترسره شوې وه؛ څو لازم ګامونه پورته شي.
د پاکستان د اقلیمبدلون وزارت محکمې ته ویلي، چې دغه غوښتنلیک دې رد شي ځکه د شته قوانینو له مخې مدعي کولای شي خپله دعوه د خېبرپښتونخوا د چاپېریال محکمې ته یوسي او د چاپېریال د قوانینو د پلي کولو واک د دغه ایالت د چاپېریال ساتنې ادارې سره دی.
