د طالبانو د ریاست الوزرا اقتصادي مرستیال ملا عبدالغني برادر ویلي چې د افغانستان پر دښمنانو غږ کوي چې افغان خاورې او حریم ته دې په بد نظر نه ګوري، او نور دې د افغانانو حوصلې نه ازمويي.
ملا برادر، پاکستان یا کوم بل هېواد ته له له مستقیمې اشارې پرته ټینګار وکړ چې طالبان هېچا ته اجازه نه ورکوي چې د افغانستان پر خاورې برید وکړي.
هغه وویل: «هر ډول تېري ته ځواب ویونکي یو او د هېواد د حریم ساتنه زموږ سرې کرښې دي.»
نوموړي زیاته کړه چې افغانستان د خپلو ملي حدودو په چوکاټ کې له ټولو هېوادونو سره د متقابلو او متوازنو اړیکو غوښتونکی دی، خو د هر ډول فشار، تېري او لاسوهنې پر وړاندې به کلک دریږي.
ملا برادر دا څرګندونې په داسې مهال کوي چې په وروستیو کې د طالبانو او پاکستان ترمنځ لفظي او امنیتي ترینګلتیاوې زیاتې شوې دي.
وړمه شپه ناوخته یو ځل بیا د پاکستان پوځ د افغانستان پر درېیو ولایتونو خوست، کونړ او پکتیکا هوایي بریدونه وکړل چې له امله یې یوه مېرمنه او ۹ماشومان ووژل شول.
د طالبانو ویاند ذبیح الله مجاهد د یادو بریدونه په تایید سره وویل چې دغو بریدونو ته به په مناسب وخت کې ځواب ووايي.
بل خوا د پاکستان د پوځ ویاند ویلي چې په افغانستان کې وروستي بریدونه دوی نه دي ترسره کړي، او که چېرې یې ترسره کړي په ډاګه وايي.
