د غزې روغتیا وزارت اعلان وکړ، چې د اسراییل او حماس د جګړې له پیل راهیسې د فلسطینانو د مړو شمېر ۷۰زره او ۱۰۰ ته رسېدلی. په ورته وخت کې ناصر روغتون د غزې په سوېل کې د اسراییل په بریدونو کې د دوو ماشومانو د مړینې راپور ورکړی دی.
دا په داسې حال کې ده، چې د اکټوبر په ۱۰مه د وروستي اوربند له پلي کېدو وروسته د اسراییل په بریدونو کې د فلسطینیانو د وژنې راپورونه لا هم خپرېږي. اسراییل ادعا کوي، چې دا بریدونه د «اوربند سرغړونو» په غبرګون کې ترسره کېږي.
جګړه د ۲۰۲۳کال د اکټوبر په ۷مه د اسراییل په سوېلي برخه کې د حماس له برید سره پیل شوه، چې په کې شاوخوا ۱۲۰۰ اسراییلیان ووژل شول او د حماس جنګیالیو ۲۵۰ یرغمل ونیول. نږدې ټول یرغمل شوي کسان یا د دوی جسدونه اوس بېرته اسراییل ته سپارل شوي دي.
د ناصر روغتون کارکوونکي چې د وژل شویو ماشومانو جسدونه یې ترلاسه کړي وايي، دا جسدونه د اتو او ۱۱ کلونو دوو وروڼو دي، چې د بې ځایه شویو یو پناه ځای ته نږدې د یوه اسراییلي ډرون په برید کې وژل شوي دي.
د اسراییل پوځ وايي، دوه داسې کسان یې وژلي چې د دوی تر واک لاندې سیمې ته ورننوتي وو او «شکمنې کړنې» یې کولې.
د پوځ په خبرپاڼه کې دا نه دي ویل شوي، چې ایا دا کسان ماشومان وو که لویان. اسراییل د غزې په سوېل کې په یوه جلا پېښه کې د یو بل کس د مړینې راپور هم ورکړ.
د اکټوبر په ۷مه د حماس او اسراییل ترمنځ د اوربند له پیل راهیسې په غزه کې لږترلږه ۳۵۲ فلسطینیان وژل شوي دي.
دواړه لوري یو بل د اوربند په ماتولو تورنوي او حماس د شنبې په ورځ له منځګړو هېوادونو غوښتنه کړې، چې په اسراییل فشار راوړي څو بریدونه ودروي.
