واشنګټن پوسټ لیکلي، رحمانالله لڼکوال پخوا د افغانستان په سوېل کې د «صفر درې» ځانګړې قطعې غړی و او د سيایاې ځواکونو سره یې د طالبانو، داعش او القاعدې مشرانو د موندلو په عملیاتو کې مرسته کوله.
اوسمهال د ټرمپ حکومت ځینو چارواکو او یو شمېر افغانانو هغه پر مذهبي افراطیت تورن کړی او ویلي یې دي، چې له همدې امله یې د امریکا د ملي ګارډ پر سرتېرو برید کړی.
واشنګټن پوسټ د سيای اې د یوه پخواني افسر له قوله لیکلي، چې لکڼوال د ترهګرۍ ضد د یوې مهمې ډلې غړی و او څو ځله یې د لوړتیا او ارزونې مرحلې تېرې کړې وې، خو دا هېڅ یو هم د دې سبب نشو چې هغه د امریکا په پلازمېنه کې له یوې ترهګریزې کړنې څخه راوګرځوي.
د ټرمپ د حکومت تر څرګندونو وروسته چې برید یې د لکڼوال مذهب او مليت پورې تړلی وباله، امریکايي رسنیو د هغه د ژوند شرایطو باندې تمرکز کړی. د امریکا د کورني امنیت وزیر ویلي، لکڼوال چې د افغانستان د ملي امنیت د ځانګړې قطعې غړی و، په امریکا کې یې بدلون وکړ او افراطي شو.
امریکايي چارواکو تراوسه په رسمي ډول دا نه دي ویلي، چې برید مذهبي یا قومي انګېزه لرله. پلټونکي له هغه کسانو سره په خبرو لګیا دي، چې لکڼوال یې پېژانده، ځینو د هغه د رواني وضعیت په اړه اندېښنې ښودلې دي.
اسوشېټېدپرېس په خپل ځانګړي راپور کې لیکلي، چې د ترلاسه شویو اېمیلونو له مخې، لکڼوال په تېرو کلونو کې له رواني ستونزو، بېکارۍ او اوږدمهالې انزوا سره مخ و.
یو پخوانی افغان پوځي قومندان چې اوس په امریکا کې اوسېږي، واشنګټن پوسټ ته ویلي: «دغو سرتېرو په افغانستان کې دندې او کورونه لرل، خو دلته یې هر څه له لاسه ورکړي و، هغوی ته ویل کېږي کار وکړئ، خو هغوی په ډېرو کارونو کې مهارت نه لري، د نوې ټولنې د منلو لپاره هم چمتو نه دي.»
لکڼوال په زابل او غزني ولایتونو کې دندې ترسره کړې وې. د واشنګټن پوسټ په خبره، هغه د نښې ویشتلو ځانګړی مهارت لاره او په شپېني او د ښارونو په ځانګړو عملیاتونو کې یې برخه اخیسته.
د سيایاې پخواني افسر میک مالروي واشنګټن پوسټ ته د لکڼوال او د هغه د نورو همکارانو په اړه ویلي: «دوی نږدې هره ورځ په سختو جګړو کې ګډون کاوه او په ترهګرۍ د تورنو کسانو د نیولو یا له منځه وړلو په لومړۍ کرښه کې جنګېدل.»
یوې بلې باخبرې سرچینې دغې ورځپاڼې ته ویلي، چې لکڼوال د باور وړ کس و او د داعش او القاعدې غړو د نیولو او وژل کېدو په عملیاتو کې یې برخه اخیسته.
لکڼوال د ۲۰۲۱ کال په اکټوبر کې امریکا ته ورسېد، خو یوازې څو میاشتې مخکې یې استوګنه ترلاسه کړې وه. سرچینې وایي، سيای اې او د امریکا د ترهګرۍ ضد مرکز هغه ارزولی و او د دغه هېواد فډرالي پولیسو هم د هغه په اړه معلومات لرل.
ستونزمن ژوند
واشنګټن پوسټ لیکلي، لکڼوال له پناه غوښتنې وروسته لا د کار اجازه نه وه تر لاسه کړې او دا وضعیت یې ژوند سخت کړی و. هغه یوه موده په امازون کې د پارسلونو د لېږد کار کاوه. د لګښت کمېدو لپاره له خپل ورور سره اوسېده، خو ډېر ژر د مالي ستونزو له امله په خپل منځ کې جوړ رانغلل او له هغه څخه جلا شو.
دغه ورځپاڼه زیاتوي، د افغانستان د صفري قطعې ډېری سرتېري په امریکا کې له مالي او رواني ستونزو سره مخ دي. سربېره پر دې، د جګړې له ټپونو، رواني، «PTSD» او د ټولنې سره د نه عادت کېدو له جدي ستونزو رنځ وړي.
د سيای اې پخوانۍ افسرې ګیتا بخشي ویلي: «تراوسه څرګنده نه ده چې دغه تاوتریخوالی د رواني ستونزې له امله و، که کوم بل جدي علت لري.»
د چهارشنبې په ورځ (د لیندۍ ۵مه) له سپینې ماڼې څخه څو کوڅې وړاندې د امریکا د ملي ګارډ پر دوو سرتېرو ډزې وشوې. امنیتي ځواکونو ۲۹ کلن افغان کډوال رحمانالله لکڼوال د دغه برید په تور ونیوو.
لکڼوال د سختو ټپونو له امله په روغتون کې بستر دی. د ملي ګارډ یوه سرتېرې له ټپې کېدو یوه ورځ وروسته مړه شوه او بل غړی لا هم په کوما کې دی.
