د طالبانو د ترانسپورت او هوايي چلند معیین فتحالله منصور وايي، په ګاونډ کې د شریرو عناصرو، چې دده په وینا، د طالبانو د نظام د له منځه وړو هڅې کوي، باید شنډې شي. منصور دا څرګندونې په کابل کې له مسلکي او تخنیکي زده کړو د طالبانو د درې زره او ۵۰۰کسانو د فراغت غونډه کې وکړې.
منصور وویل: « اوسنی اسلامي نظام د سلګونو زره افغانانو په وینو رامنځته شوی او ساتنه یې پر ښځو او نارینه وو فرض ده».
هغه د افغانستان د تېرو څو پېړیو جګړو ته په اشارې وویل چې بریتانیا، پخواني شوروي اتحاد او د امریکا په مشرۍ نړیوال ځواکونه ټول د افغانانو د قربانیو په نتیجه کې مات شول.
ده زیاته کړه چې اوسنی نظام هم د قربانیو او د استعدادونو د کارولو له لارې خوندي پاتې کېږي.
سره له دې چې منصور د کوم ځانګړي بهیر نوم وانخیست، خو ظاهرا اشاره یې د پاکستان په کوربه توب د یو شمېر افغان سیاسي فعالانو وروستۍ ناستې ته ده.
د تلې میاشتې په دې ناسته کې شاوخوا ۳۰ افغان سیاسي څېرو، د مدني ټولنې فعالانو، د پخواني حکومت چارواکو او همدارنګه د پاکستان ۴۰ پخوانیو چارواکو ګډون کړی و.
طالبان دغه راز د پاکستان په پوځ کې یوې برخې ته هم د شریرې کړۍ اصطلاح کاروي، چې ددوی په وینا، د کابل او اسلام اباد د اړیکو پر وړاندې خنډ ده.
