د طالبانو د ریاستالوزرااقتصادي مرستیال ملا عبدالغني برادر اخوند په مشرۍ د دې ډلې د ملي تدارکاتو کمیسیون د ۱۴۰۴ لمریز کال د لیندي میاشتې پر ۱۱مه، په خپله نوبتي غونډه کې د یونیم میلیارد افغانیو په ارزښت ۱۱ پروژې منظور کړې دي.
د یاد ریاست د معلوماتو له مخې، په دې غونډه کې شاوخوا ۳۰ پروژې د منظورۍ لپاره وړاندې شوې وې، چې له هراړخیزو بحثونو وروسته، د یو میلیارد او ۵۳۸ میلیونو افغانیو په ارزښت ۱۱ پروژې تصویب شوې او په ۱۵ نورو پروژو کې یولړ تعدیلونه راغلل؛ د یوې پروژې قرارداد فسخ، یوه اعاده او د دوو پروژو په اړه نور اقدامات هم تایید شول.
سرچینه وايي، چې د منظورو شویو پروژو ارزونه د ټاکل شویو کمېټو له خوا ترسره کېږي، او پایلې به د ملي تدارکاتو کمیسیون مشرتابه ته وړاندې شي.
په تصویب شویو پروژو کې د تخار ولایت د درقد ولسوالۍ یتیم تپې د تحکیماتو نهم لاټ، د غور هوایي ډګر د ځغل لیکې ترمیم، د کابل نړیوال هوایي ډګر د حفظ او مراقبت قراردادونه او د بغلان د دهنه غوري څه باندې ۱۷ کیلومتره سړک جوړول شامل دي.
دغه راز د پکتیکا د زرګرانو ـ ګردیز ښار سړک جوړول، د شمال ډبرو سکرو دولتي شرکت ته د معدني وسایلو پېرل، د افغان ټور شرکت لپاره د اړتیا وړ موټرو پېرل، له قره باغ او مقر څخه تر شاه جوی پورې د سب سټیشنونو جوړول او نصب هم ددې پروژو برخه دي.
د طالبانو د ریاست الوزرا اقتصادي معاونیت په وینا، د کابل موسهي ولسوالۍ د برېښنا رسونې، ودانیزو توکو، نصب او مونتاژ، او د باریکاب د ۲۲۰ کیلوولټه سب سټیشن د سروې، ډیزاین او ټیسټ ورکولو قراردادونه هم په دې پروژو کې شامل دي.
