د طالبانو د ریاستالوزرا اقتصادي مرستیال ملا عبدالغني برادر د ایران د عامې روغتیا وزارت له مرستیال مهدي پیر صالحي او په کابل کې د دغه هېواد له سفیر علي رضا بیکدلي سره د روغتیا او درملو په برخه کې پر همکاریو خبرې کړې دي.
د طالبانو تر واک لاندې ارګ په خبرپاڼه کې ویل شوي، چې په دې لیدنه کې د ایران د روغتیا وزارت مرستیال له افغانستان سره د تهران د همکاریو د پراخېدو وړاندیز کړی.
هغه ویلي چې ایران چمتو دی له افغانستان سره د درملو او طبي وسایلو د تولید او صادراتو په برخو کې خپلې همکارۍ د اوږدمهال لپاره زیاتې کړي.
خبرپاڼه زیاتوي چې ملا عبدالغني برادر د ایران له حکومت څخه مننه کړې او ډاډ یې ورکړی چې د طالبانو اړوندې ادارې به د درملو د تولید، تجهیزاتو او صادراتو په برخه کې له ایران سره ګډ کار او پوره همکاري کوي.
دا لیدنه په داسې حال کې کېږي چې له پاکستان سره د دې ډلې له ترینګلتیاوو او نښتو وروسته طالبانو له اسلام اباد سره هر ډول سوداګري بنده کړې او د بدیلو لارو په لټه کې دي.
ایران له تېرو کلونو راهیسې د افغانستان په روغتیايي سکتور کې د وسایلو، درملو او تخنیکي تجربو د شریکولو اعلان کړی، خو اوسنی بحث د دواړو لوریو ترمنځ د اوږدمهاله صنعتي او روغتیايي همکاریو په لور نوی ګام بلل کېږي.
