د ډسمبر درېیمې نېټې په مناسبت، چې د معلولیت له نړیوالې ورځې سره سمون خوري، ملګري ملتونه وایي، ۲۴،۶ سلنه افغانان له نرم معلولیت سره ژوند کوي، په داسې حال کې چې ۴۰ سلنه یې متوسط معلولیت تجربه کوي او نږدې ۱۳،۹سلنه یې له سختو بڼو سره مخ دي، چې شمېر یې ۱،۵ میلیونه تنه اټکل کیږي.
په کابل کې د ملګرو ملتونو دفتر د یوې اعلامیې په خپرولو سره ویلي چې د معلولانو لوړ شمېره دوی دې ته اړ باسي چې په ډیر بیړني ډول عمل وکړي.
یاد دفتر وايي، معلولیت لرونکي کسان باید د وروسته پاتې فکر په توګه ونه ګڼل شي، دوی باید د پلان جوړونې، پریکړې کولو او خدماتو وړاندې کولو په هره مرحله کې په بشپړه توګه مدغم شي.
په افغانستان کې د ملګرو ملتونو د استازولۍ مرستیال او د بشري چارو همغږوال انډریکا راټواټ ویلي،«زموږ په ټولو فعالیتونو او پروژو کې، موږ ډاډ ترلاسه کوو چې معلولیت لرونکو کسانو ته لومړيتوب ورکول کیږي او د دوی د بشپړ ظرفیت درک کولو ملاتړ کیږي».
هغه زیاته کړې چې د ژوند په ټولو برخو کې د معلولیت لرونکو کسانو شاملول او ډاډمن کول د یو سوله ییز، عادلانه او سوکاله افغانستان په جوړولو کې د مرستې لپاره مهم ګام دی.
په افغانستان کې د ملګرو ملتونو دا چارواکی وایي چې د لسیزو جګړو، بې ځایه کیدو، وچکالۍ، او کمزورو روغتیایي او اقتصادي سیسټمونو په ټول هیواد کې د معلولیت کچه لا پسې لوړه کړې ده.
ملګري ملتونه په اعلامیه کې وايي، چې دوی به په ټولنه کې د معلولیت لرونکو کسانو د ادغام ستراتیژۍ پلي کولو ته دوام ورکوي.
