د طالبانو حکومت د کډوالو ستونزو ته د رسېدنې عالي کمېسیون د تازه معلوماتو پر اساس د جمعې په ورځ له پاکستان او ایران څخه ټول ۲۹۶۵ افغان کډوال د هېواد بېلابېلو لارو څخه جبري افغانستان ته ستانه کړل شوي دي.
ددغه کمېسیون په راپور کې راغلي، د جمعې په ورځ د (لیندۍ ۱۴مه) له پاکستان څخه ۲ زره او ۵۴۳ افغان کډوال د تورخم، سپین بولدک او بهرامچې (ډیورنډ کرښې) له لارې هېواد ته راستانه شوي.
راپور زیاتوي، همدارنګه، په همدې موده کې له ایران څخه ۴۲۲ افغان کډوال د اسلام کلا او ورېښمو بندرونو له لارې را ستانه شوي دي. د کمېسیون د معلوماتو له مخې، راستانه شوي افغان کډوال د هېواد بېلایبلو ولایتونو ته خوندي لېږدول شوي دي.
راپور کې راغلي، ټول ثبت شوي کډوال ۲۹۶۵ تنه وو چې ۵۷۶ کورنۍ وې. د طالبانو حکومت د کډوالو د ستونزو د رسېدنې عالي کمېسیون د معلوماتو پر اساس، د دې کډوالو ټول معلومات ثبت شوي او د اړتیا وړ خدمات ورته برابر شوي دي.
همدا راز ویل شوي چې دغه کډوالو سره ۸۲۷۶۴۰۰ افغانۍ مالي مرسته شوې ده. همدارنګه، دوی ته بېلابېلو برخو کې خدمات لکه صحي، خوارکي او بنسټیزې اړتیاوې وړاندې شوي، څو د هېواد دننه د ستنېدو پروسه یې اسانه شي.
په پاکستان او ایران کې د افغان کډوالو نیولو او جبري ستنولو عملیات په وروستیو میاشتو کې خورا چټک شوي دي. د پاکستان د پلازمینې اسلام اباد او نورو ښارونو کې پولیس کور په کور د افغانانو د لټون عملیات کوي او په ډېرو سیمو کې د هغوی د کورونو دروازې ماتې شوي.
دې لړۍ د ډېرو افغانانو د ژوند شرایط سخت کړي او د بشري مرستو اړتیا یې زیاته کړې ده.
