نتنیاهو وايي چې که د اسراییل ولسمشر یې بښنه ومني هم له سیاسته لاس نه اخلي
د اسراییل لومړي وزیر بنیامین نتنیاهو ویلي، چې که د یاد هېواد د ولسمشر له لوري یې بښنه ومنل شي، بیا به هم له سیاست څخه تقاعد ونه وکړي. نوموړی دمګړۍ په درغلیو تورن دی.
د اسراییل لومړي وزیر بنیامین نتنیاهو ویلي، چې که د یاد هېواد د ولسمشر له لوري یې بښنه ومنل شي، بیا به هم له سیاست څخه تقاعد ونه وکړي. نوموړی دمګړۍ په درغلیو تورن دی.
د اسراییل لومړي وزیر د یوې خبریالې د دې پوښتنې په ځواب کې چې که ولسمشر اسحاق هرتزوګ یې وبښي، له سیاست څخه به لاس واخلي؟ لنډ ځواب ورکړی:«نه»
نتنیاهو تېره میاشت د اسراییل له ولسمشر اسحاق هرتزوګ څخه د بښنې غوښتنه کړې وه او د هغه وکیلانو استدلال کاوه، چې محکمې ته دوامداره حاضریدل د لومړي وزیر د حکومتدارۍ وړتیا اغېزمنوي او بښنه به د هېواد په ګټه وي.
د نتنیاهو له خوا پر داسې مهال د بښنې غوښتنه شوې، چې پر نوموړي د فساد او له باور د سرغړونې تورونه لګول شوي دي، خو نتنیاهو دغه تورونه رد کړي او د هغه وکیلانو یې ویلي، چې که قانوني بهیر پای ته ورسیږي نوموړی به بې ګناه وپيژندل شي.
په اسراییل کې معمولا بښنې یوازې هغه وخت ورکول کېږي، چې قضايي بهیر پای ته ورسیږي او د محاکمې په بهیر کې د بښنې کومه سابقه نشته.
پر همدغه مهال د بنیامین ځینو مخالفو سیاستوالو ویلي، چې د نتنیاهو د بښنې منل باید له سیاست څخه د هغه په وتلو پورې مشروط وي.
