یونسکو د افغانستان د بهزاد د ميناتورۍ سبک په نړیوالو میراثونو کې شامل کړ
د ملګرو ملتونو د پوهنې، ساینس او فرهنګ سازمان یا یونسکوپه هند کې د خپلې غونډې په ترڅ کې د افغانستان د بهزاد د ميناتورۍ سبک د فرهنګي میراثونو په نړیوال نوملړ کې شامل کړی دی.
د ملګرو ملتونو د پوهنې، ساینس او فرهنګ سازمان یا یونسکوپه هند کې د خپلې غونډې په ترڅ کې د افغانستان د بهزاد د ميناتورۍ سبک د فرهنګي میراثونو په نړیوال نوملړ کې شامل کړی دی.
په فرانسه کې د افغانستان سفیر محمد همایون عزیزي افغانستان انټرنشنل – پښتو ته وویل چې نن په نوي ډیلي کې د یونسکو د ناپېژندل شویو فرهنګي میراثونو په شلمه غونډه کې د استاد بهزاد د میناتورۍ هنري مکتب د افغانستان په نوم د بشریت په نړیوالو میراثونو کې ثبت شو.
عزیزي چې په دې موخه یې د یونسکو سازمان په شلمه غونډه کې ګډون کړی و، زیاته کړه چې« له دوو کالونو راپه دې خوا مو دا هڅه پیل کړې وه او دا دی نن یې رنګ راوړ، دا ثبت یوه نړیواله پېژندنه ده چې نړۍ په رسمي ډول د افغانستان د هنر، رنګونو، داستانونو او کلتوري ریښو اهمیت مني».
هغه افغانستان انټرنشنل – پښتو سره په خبرو کې وویل چې کمالالدین بهزاد د افغاني ټولنې یو ستر نابغه و او سلګونه کاله وړاندې یې داسې اثار پنځولي چې لا یې هم نړۍ په لیدلو حیرانېږي.
بهزاد د خپل قلم له لارې د افغان انسان ژوند، مهربانه څېرې، دودیزې جامې، ورځنۍ صحنې او رنګونه ژوندي کړي، داسې رنګونه چې خبرې کوي، کیسې کوي او زړه ته لاره مومي.
سفیر عزیزي وویل، دا نړیواله پېژندنه یو څرګند پیغام لري چې افغانستان ژوندی دی، افغان هنر ژوندی دی اوهیڅ تیاره نه شي کولی د افغانستان د کلتور رڼا مړه کړي.
بهزاد د هرات د میناتورۍ د مکتب یو له خورا سترو او نوښتګرو هنرمندانو ګڼل کېږي.
د ده کارونه ډېری د هغه په خطي نسخو کې لیدل کیږي، چې د ترکیببندۍ دقت، د رنګونو انډولیز استعمال او د انځورونو طبیعي رنګ پکې له ورایه برېښي.
د هنرپوهانو په باور، بهزاد د رښتیپالنې او د ټولنیزو فعالیتونو د انځورولو له لارې د دربارونو او عامو خلکو ژوند انځور کړی دی.
